Ընտրական թանկարժեք սարքավորման առաջին փորձարկումը

Երեկ կայացած տեղական ինքնակառավարման մարմինների ընտրությունների ժամանակ Կենտրոնական ընտրական հանձնաժողովը փորձարկեց ընտրողների գրանցման համար նախատեսված նոր տեխնիկական սարքավորումը: Նշենք, որ  Գեղարքունիքի մարզի Սեմյոնովկա գյուղում  ավագանու ընտրություններին  հետևել են Կենտրոնական ընտրական հանձնաժողովի նախագահ Տիգրան Մուկուչյանը, Կառավարության աշխատակազմի ղեկավար-նախարար Դավիթ Հարությունյանը և այլ պաշտոնյաներ: 

ԼՈւՐԵՐ.com-ի հետ զրույցում Սեմյոնովկա համայնքի ղեկավար Դավիթ Մնացականյանը նշեց, որ թեև սարքավորումն առաջին անգամ էին կիրառում իրենց համայնքում, բայց դա ոչ մի կերպ չի խաթարել ընտրական գործընթացը:

«Գյուղացիները մոտենում էին սարքավորմանը, նրանց անձնագիրը սարքի միջով անցկացնելուց հետո էկրանին երևում էր՝ տվյալ ընտրողն առաջին անգա՞մ է եկել քվարկության, թե՞ ոչ, պարզ էր դառնում նաև՝ արդյո՞ք նա տվյալ տեղամասի ընտրող է, թե՝ ոչ: Դա պարզելուց հետո ընտրողները թողնում էին իրենց մատնահետքը, որից հետո անձը մասնակցում էր քվեարկությանը: Եթե ընտրողը եկել էր կրկնաքվեարկության, կարմիր լույս էր վառվում»:

Արդյոք Սեմյոնովկա համայնքում նախքան նոր սարքավորման տեղադրումը, կրկնաքվեարկություններ լինում էին, համայնքի ղեկավարը նշեց. «Ո՛չ, նախկինում էլ մեզ մոտ նման դեպքեր չեն եղել»: 

Իսկ հարցին՝ սարքավորման առաջին փորձարկումը չառաջացրե՞ց հերթեր ընտրատեղամասերում, գյուղապետը պատասխանեց. «Հերթեր չեն առաջացել, ընտրատեղամասերում կուտակումներ չեն եղել»:

Հիշեցնենք, որ ԵՄ-ը 7 մլն եվրո գումար է հատկացրել խորհրդարանակն ընտրությունները միջազգային չափանիշներով անցկացնելու համար: Նշված գումարով պետք է տեղադրվեին ժամանակակից սարքավորումներ՝ մատնահետքերով ընտրություններ անցկացնելու համար:

Առաջիկա ընտրություններին մինչեւ 900 ընտրող ունեցող տեղամասերում կտեղադրվի 1 սարքավորում, իսկ 900-ից ավելի ընտրողի դեպքում՝ 2 և ավելի:

Նշենք նաև, որ ԵՄ-ը 17 մլն եվրո էլ նախատեսում էր հատկացնել ընտրատեղամասերում և ընտրատեղամասերից դուրս տեսախցիկներ տեղադրելու նպատակով: 

Աղավնի Սուքիասյան

Լուսանկարն՝ Ա1+-ի