Գերմանացի քանդակագործը ներկայացրեց Լևոն Արոնյանի 17 կգ-ոց քանդակը (լուսանկարներ)

Գերմանացի քանդակագործ Բերտրան Ֆրեյսլեբենին քանդակել է Հայաստանի շախմատի հավաքականի առաջատար Լևոն Արոնյանի կիսանդրին:

Այսօր տեղի ունեցած մամուլի ասուլիսի ժամանակ Ֆրեյսլեբենին ներկայացրեց շախմատիստի քանդակը: 

«Ուրախ եմ, որ  Հայաստանում եմ: Հայաստանի և Գերմանիայի համատեղ պատմությունն ունի ոչ շատ լավ էջեր և ներողություն եմ խնդրում դրա համար: Նախապես ուզում եմ ասել՝ շատ եմ գնահատում, թե ինչ է անում Հայաստանը՝ շախմատի համար: Այսքան ջանք և եռանդ դնելը այս խաղի մեջ՝ շատ գովելի է: Ես Հայաստանում տեսնում եմ, որ Լևոնն իր կյանքը նվիրել է շախմատին: Շախմատի ֆեդերացիան ամեն ինչ անում է՝ մարզաձևի զարգացման համար:

Արևմտյան երկրներում չկա այն, ինչ կա Հայաստանում: Հայաստանն այս առումով հարուստ է»,- ԼՈւՐԵՐ.com-ի թղթակցի փոխանցմամբ՝ լրագրողների հետ զրույցում նշեց Ֆրեյսլեբենին: 

«Իսկապես մեծ ցանկություն ունեի Լևոնին ճանաչելու: Մեծ բախտ է ինձ համար, որ Լևոնը Բեռլինում էր, որտեղ ես էի ապրում և հեշտ էր կազմակերպել հանդիպումը: Նրա հետ շատ հեշտ էր շփվել: Նա հանդիպմանը եկավ հեծանիվով: Մենք միանգամից հասկացանք, որ թե իմ աշխատանքը, թե իր աշխատանքը շատ նման են իրար: Ընկերական մթնոլորտ էր: Նա հիանալի անձնավորություն է: Շատ պայծառ մարդ է: նա սիրում է գինի, սիրում է շախմատ: Նրա հետ կարելի է խոսել ցանկացած թեմայով: Քանդակով ցանկանում էի ցույց տալ, թե որքան խորը անձնավորություն է Լևոնը»,- նշեց քանդակագործը:

«Ճամփորդ» շաբաթաթերթի խմբագիր Արիանա Կաոիլին ասաց, որ Լևոնը Արոնյանը չի կարողացել ներկա գտնվել ասուլիսին, քանի որ մի քանի օրից շատ կարևոր  մրցաշար ունի և պատրաստվում է դրան: 

Նշենք, որ Արոնյանի արձանը բրոնզից է և կշռում է 17 կգ, պատվանդանը 5 կգ է:

Քանդակագործը հույս հայտնեց, որ արձանը շախմատի ֆեդերացիայում իր արժանի տեղը կգտնի: