ՔԿՀ-ներում դատապարտյալների կողմից խարդախությամբ հափշտակության դեպքերի աճ է գրանցվել

ՀՀ քննչական կոմիտեի վարույթում գտնվող գործերի ուսումնասիրությունների համաձայն' նախորդ տարի հանրապետությունում գրանցվել է խարդախությամբ գույքի և գումարի հապշտակության 964 դեպք: 106 դեպքերում հանցագործությունները կազմակերպվել և իրականացվել են քրեակատարողական հիմնարկներում: Վերջիններիս կողմից քաղաքացիներին և իրավաբանական անձնանց պատճառված գույքային վնասը նախնական տվյալներով գնահատվում է մոտ 150 միլիոն դրամ:

«Անցած տարի և այս տարի շարունակվում են այնպիսի հանցագործությունների կատարումը, ինչպիսին են խարդախությունը: Այդ հանցագործության պատճառները և պայմանները մենք պետք է փնտրենք քրեակատարողական հիմնարկներում և հասարակության իրազեկվածության պակասի մեջ: Այս գործերի ուսումնասիրությունը ցույց է տալիս, որ հանցագործությունների զգալի մասը կատարվում են օգտագործելով քաղաքացիների չիմացությունը, անզգոնությունը և անտեղյակությունը: Հանցագործները, չարաշահելով մարդկանց վստահությունը, կատարում են նմանատիպ հանցագործություններ»,- փետրվարի 13-ին խորհրդակցության ժամանակ նշեց ՀՀ քննչական կոմիտեի նախագահ Աղվան Հովսեփյանը:
ՔԿ վարույթում քննվող քրեական գործերով ձեռք բերված փաստական տվյալները վկայում են, որ քրեակատարողական հիմնարկներում պահվող անձանց կողմից խարդախությունները կատարվել են տարբեր եղանակներով' որպես կանոն օգտագործելով բջջային հեռախոսները, որոնց միջոցով հնարավորություն են ունեցել օգտվելու ինտերնետային կապից: Ազատազրկման մեջ գտնվող դատապարտյալները կամ կալանքի տակ գտնվող անձինք իրենց հանցավոր մտադրություններն իրականացրել և ավարտին են հասցրել ազատության մեջ գտնվող հանցակիցների միջոցով:

«Պետք է մշակել անհրաժեշտ մեխանիզմներ, որոնք զգալի կնպաստեն այդ հանցագործությունների կանխարգելմանը»,- այս առնչությամբ ընդգծեց Հովսեփյանը:

ՀՀ քննչական կոմիտեի ստորաբաժանումների վարույթում գտնվող քրեական գործերի ուսումնասիրությունից պարզվել է, որ խարդախության եղանակով կատարված հափշտակություններից ևս 100 և ավել դեպքերով առերևույթ հանցագործություն կատարած անձինք տուժողների հետ կապ են հաստատել բջջային հեռախոսների միջոցով, իսկ կատարված զանգերը սպասարկվել են ՀՀ ԱՆ տարբեր քրեակատարողական հիմնարկների մոտ տեղակայված ալեհավաքների կողմից:

ՔԿՀ-ներում տեխնիկական միջոցների օգտագործմամբ կազմակերպվել և իրականացվել են նաև թմրամիջոցների ապօրինի շրջանառության դեպքեր: