Անցանկալի հղիությունից պաշտպանվելու միջոցները

  Ժամանակակից բժշկությունն անցանկալի հղիությունից պաշտպանվելու բազմաթիվ միջոցներ է առաջարկում: Դրանք տարաբնույթ պահպանակներն են, հակաբեղմնավորիչ հաբերը, ներարգանդային պարույրները, պաշտպանվելու տարբեր մեխանիկական և վիրահատական միջոցներ: Սակայն հղիությունից խուսափելու համար համապատասխան պաշտպանիչ միջոցը պետք է որոշի բժիշկը` որոշակի հետազոտություն անցկացնելուց հետո:

_ Մինչև երեսուն տարեկան կանանց խորհուրդ ենք տալիս օգտվել հակաբեղմնավորիչներից: Ներարգանդային պարույրները հակացուցված են չծննդաբերած կանանց, դա կարող է նրանց մոտ շատ լուրջ հետևանքների հանգեցնել` ընդհուպ մինչև անպտղություն,- «Հայելի» ակումբում հոկտեմբերի տասին ասուլիսի ժամանակ ասաց Բժշկական գիտությունների թեկնածու Մարինե Ոսկանյանը:

-Հակաբեղմնավորիչ հաբերի դեպքում, դրանց օգտագործումը ցանկալի է մինչև երեք տարի. հինգ տարի և ավել օգտագործման դեպքում հնարավոր է կրծքի քաղցկեղի առաջացման վտանգ: 

Ընդհանրապես մասնագետները խորհուրդ են տալիս բոլոր միջոցներից օգտվելով հաջորդաբար և ժամանակային որոշ կտրվածքով.

-Ցանկալի է, որ վեց ամիս հակաբեղմնավորիչներ ընդունեն, հաջորդ վեց ամիսը պահպանակ օգտագործեն և այդպես անընդհատ փոփոխեն պաշտպանվելու միջոցները. այդպես ոչ առողջությանն է վտանգ հասցվում, ոչ էլ հետագայում երեխա ունենալու հետ կապված խնդիրներ են առաջանում,- իր խոսքը եզրափակեց գինեկոլոգ Մ. Ոսկանյանը: