Լևոն Տեր-Պետրոսյանը կարող է շնորհակալություն հայտնել ադրբեջանցիներին՝ ամեն օր մեր դիրքերի վրա կրակելու և հայ զինվորներին սպանելու համար. քաղաքագետ

ԼՈւՐԵՐ.com-ի հարցազրույցը՝ քաղաքագետ Հրանտ Մելիք-Շահնազարյանի հետ: 

-Պարո՛ն Մելիք-Շահնազարյան, նախկին նախագահ Լևոն Տեր-Պետրոսյանը երեկ իր հարցազրույցում արցախյան հակամարտւթյան կարգավորման համար պատասխանատու մարմին համարեց միջազգային կազմակերպություններին՝ մասնավորապես ԵԱՀԿ ՄԽ-ին: Արդյո՞ք ճիշտ է Հայաստանի և Արցախի անվտանգության հարցը վստահել բացառապես ԵԱՀԿ  ՄԽ-ին:

-Ես կարծում եմ, որ առաջին նախագահը խոսում է մի բանի մասին, որն իրականում գոյություն չունի: Նա առաջարկում է բոլոր հոգսերը թողնել միջազգային հանրության ուսերին: Դա անթույլատրելի է, որովհետև  խոսքը վերաբերում է հայկական երկու պետությունների անվտանգությանն, իսկ դա թողնել այլ քաղաքական շահեր հետապնդող միջազգային ուժերին,  անթույլատրելի է և չի համապատասխանում մեր շահերին: Լևոն Տեր-Պետրոսյանի տրամաբանությունն այդ է՝  թողնել, որ Արցախի հարցը միջազգային հանրությունը որոշի, և  մենք էլ համաձայնենք այդ որոշմանը: Նախկին նախագահը չթվեց նաև այն երաշխիքները, որոնցով կարող ենք վստահ լինել, որ այդ ցանկալի խաղաղությունը կհաստատվի: Նա չի տալիս նման երաշխիքներ,  ասում է, որ դա երկրորդ փուլին է վերաբերում, որի մասին մենք չենք խոսում: Ստացվում է՝ առաջարկում է միայն՝ մեր քաղաքական ռեսուրսներն այլ պետության հանձնել:

-Նախկին նախագահն իր խոսքում նշում է, որ միջազգային հանրությունը թույլ չի տա սահմանների փոփոխություններ: Ինչո՞վ եք պայմանավորում նրա այս դիրքորոշումը: 

-Նա օրինակներ է բերում իր խոսքի ընթացքում, որոնք ունեն հակառակ փաստարկները: Երբ ասում է, որ միջազգային հանրությունը թույլ չի տա սահմանների վերափոփում, չի ասում հակառակը, որ խորհրդային միության փլուզումից մինչ մեր օրերը մենք ականատես ենք եղել տասնյակ պետությունների սահմանների փոփոխությունների, որոնք այդ նույն միջազգային հանրությունը լեգիտիմացրել և ընդունել է: ՀՀ առաջին նախագահն ասում է, որ երբեք չի լինի այս կամ այն բանը, բայց մեր աչքի առաջ ամեն օր է նման բան է կատարվում, հետևաբար, նրա այս դիրքորոշումը վստահություն չի ներշնչում: 

-Լևոն Տեր-Պետրոսյանը շեշտեց, որ  Արցախի ժողովուրդը պետք է շնորհակալ լինի Ադրբեջանին այն ամենի համար, ինչ ունի՝ Արցախի ժողովրդի ազատ ինքնորոշման իրավունքն անվանելով հրաշք: Ինչպե՞ս եք վերաբերվում  այն բանին, որ ՀՀ առաջին նախագահը եթերով շնորհակալություն է հայտնում մեր հակառակորդ պետությանը: 

-Լևոն Տեր-Պետրոսյանը կարող է շնորհակալություն հայտնել ադրբեջանցիներին՝ ամեն օր մեր դիրքերի վրա կրակելու և հայ զինվորներին սպանելու համար, ինչո՞ւ ոչ, կարող է նաև դրա համար շնորհակալություն հայտնել Ադրբեջանին: 

-Արցախին պատկանող տարածքների մասին խոսելիս՝ նախկին նախագահը դրանք անվանեց Ղարաբաղի վերահսկողության տակ գտնվող տարածքներ՝ «արցախապատկան հողեր» եզրույթն օգտագործելու փոխարեն: Սա միտումնավո՞ր էր ասված:

-Սա միտումնավոր ասված խոսք էր: Նա առաջնորդվում է միայն միջազգային իրավունքով ամրագրված եզրույթներով: Բայց նա չի ասում, որ բոլոր պետությունները, որոնք հայրենիքը պատմական են համարում, փորձում են իրենց այդ գաղափարը միջազգային տարբեր ակտերով հիմնավորել և հարցերը քննարկել այդ տրամաբանության մեջ: Հիմա, եթե չկա ձևակերպված հասկացություն, նշանակում է՝ մենք պետք է այդ տարածքներից հրաժարվե՞նք՝ միջազգային հանրության մոտ ձևակերպված հասկացություններ դարձնելու փոխարեն: Ես չեմ ընդունում նախկին նախագահի այս պնդումը:  

Հարցազրույցն՝ Աղավնի Սուքիասյանի