Մրցմանը շատ լավ էինք պատրաստվել. ծանրամարտիկներն ամփոփեցին Եվրոպայի առաջնությունը

Մրցմանը շատ լավ էինք պատրաստվել: Այս մասին ԼՈւՐԵՐ.com-ի թղթակցի փոխանցմամբ` լրագրողների հետ զրույցում ասաց ծանրամարտի Եվրոպայի չեմպիոն Սիմոն Մարտիրոսյանը:

Եվրոպայի առաջնությունում գրանցած հաջողություններից հետո ծանրամարտի Հայաստանի տղամարդկանց հավաքականի  գլխավոր մարզիչ Փաշիկ Ալավերդյանը, ծանրամարտի Եվրոպայի առաջնության չեմպիոն Սիմոն Մարտիրոսյանը, ծանրամարտի Եվրոպայի առաջնության արծաթե մեդալակիր Գոռ Մինասյանը և ծանրամարտի Եվրոպայի առաջնության բրոնզե մեդալակիր Ռուբեն Ալեքսանյանը հանդիպեցին լրագրողների հետ: 

«Սպասումները մեծ էին: Սպասումներս արդարացան միայն պոկում վարժությունում, որովհետև հրումում ուրիշ կիլոգրամներ էինք նախատեսել, բայց այլ բան եղավ»,-ասաց Գոռ Մինասյանը:

Ըմբիշ Լաշայի մասին խոսելիս՝ Գոռն ասաց.

«Նրա հետ մասնակցում եմ արդեն 6-7 տարի, ոչ մի խոսք չկա: Շատ ուժեղ մարզիկ է, բայց պետք է ամեն ինչ անենք, որ դառնա երրորդը: Մեզանից հետո»:

Եվրոպայի առաջնության բրոնզե մեդալակիր Ռուբեն Ալեքսանյանը ասաց.

«Ինձ թվում է՝ արդյունքները նորմալ էին և՛ պոկում, և՛ հրում վարժություններում: Անհաջող մոտեցումներին պատվիրված քաշերն իմ ուժերի սամանում էին, իմ սխալն էր պարզապես: Կփորձեմ առաջիկա մրցաշարում շտկել սխալներս և ավելի լավ հանդես գալ: Լուրջ վնասվածք չունեմ: Թեթև հոդախախտ է եղել, առաջիկայում կսկսեմ մարզումները: Ամեն ինչ նորմալ է: Ձեռքս կապված է, որպեսզի հետագայում խնդիրներ չլինեն»:

Եվրոպայի չեմպիոն  Սիմոն Մարտիրոսյանն իր  ելույթի մասին խոսելիս, ասաց.

«Մրցմանը շատ լավ էինք պատրաստվել: Գիտեի, որ մրցակիցը կարող էր լինել Դավիթ Բեջանյանը, բայց նա այնքան էլ լավ մարզավիճակում չէր: Մրցակցություն կար:  Ես էլ պոկում վարժությունում միայն առաջին մոտեցման ժամանակ հաջող հանդես եկա: Հրում վարժության իմ արդյունքներից գոհ եմ, իսկ պոկումից՝ ոչ: Եթե ինչ-որ մեկը լինի, որ ինձ պետք է հաղթի, թող դա լինի Սամվել Գասպարյանը»: