Հոգեկան հիվանդություն ունեցողներին անորակ դեղերը դարձնում են ինքնասպաններ. նախարարությունը լռում է

Հոգեկան առողջության խնդիրներ ունեցող 300 քաղաքացու Հայաստանում այլևս անվճար չի տրամադրվի Զիպրեքսիա դեղորայքը, որն ինչպես նշում են շահառուների հարազատները, միակ դեղն է, որը տալիս է դրական ազդեցություն և հիվանդները կարիք չեն ունենում ստացիոնար բուժում ստանալու: 

«Հոգեկան առողջության վերականգնման հայկական ասոցացիա» ՀԿ-ի շահառուներն ահազանգ են հնչեցնում՝ շեշտելով, իրենց հիվանդները ծայրահեղ վիճակում են:  

«Որդուս մեկ շաբաթ տվել եմ մեզ տրվող անորակ այս դեղը: Նրա վիճակը գնալով ավելի է վատթարանում: Դիմել ենք բժշկին, ասում է՝ ինչ անենք՝ բեր հիվանդանոց: Ստիպված ես եմ գնում և դեղատնից Զիպրեքսիա գնում՝ 30 հազար դրամով: Ինչպե՞ս գնեմ այդ թանկ դեղը: Նախկնում պետությունը մեզ դա անվճար էր տալիս, խնդրում ենք, որ այդ ծրագիրը շարունակվի: «Արփիմեդ» ընկերության Ազալեպսին դեղը բացարձակ անորակ է»,-ասաց «Հոգեկան առողջության վերականգնման հայկական ասոցացիա» ՀԿ-ի շահառուներից մեկի մայրը՝ տիկին Ռոզան: 

Նույն ՀԿ-ի ղեկավար Կարինե Խոդիկյանն անընդունելի է համարում ԱՆ Լևոն Ալթունյանի դիտարկումը, թե Զիպրեքսիան թանկ է և նախարարությունը գնում է խնայողության՝ նշելով, որ տրամադրվող անորակ դեղերը մեծացնում են ինքնասպանությունների թիվը Հայաստանում: ԼՈւՐԵՐ.com-ի հարցին՝ նախարարն ի՞նչ է պատասխանել դիտարկմանը, որ նման հիվանդները, հոգեբուժարանում հայտնվելու դեպքում՝ ավելի մեծ ծախս են պահանջելու, տիկին Թուխիկյանը  պատասխանեց. «Նախարարը հինգ տոկոսով է ինֆորմացված, չգիտի՝ ովքե՞ր են հոգեկան առողջության խնդիր ունեցող մարդիկ, նրանց ի՞նչ է պետք: նա տեղյակ չէ և երբ իրեն խնդիրը ներկայացրեցինք, նա համակ ուշադրությամբ մեզ լսեց և ընդամենն ասաց, որ կիսում է մեր խնդիրը, բայց գումար չկա»,-նշեց նա՝ հավելելով, որ մինչ ծրագրի կասեցումը ամեն տարի բյուջեից  80 միլիոն դոլար է հատկացվել Զիպրեքսիայի գնման համար:

«Այս հիվանդությունը խարան է և ի շնորհիվ նախկինում մեզ անվճար տրվող Զիպրեքսիայի, հոգեկան խնդիրներ ունեցող ամուսնուս վիճակը բարելավվում էր: Նա ինքնակամ խմում էր այդ դեղը: Հոգեկան վիճակը շատ լավ էր լինում»,-ասաց  «Հոգեկան առողջության վերականգնման հայկական ասոցացիա» ՀԿ-ի շահառուներից մյուսի կինը՝ տիկին Թամարան՝ նշելով, որ Զիպրեքսիայի փոխարեն ամուսնուն տվել են Զոլաքսա դեղորայքը, որը տվել է հակառակ էֆեկտ:

Աղավնի Սուքիասյան