Թրամփն ընտրություն ունի՝ կանգնելու արդարության կողքին կամ կոծկելու այն` Թուրքիայի ճնշման տակ. հայերը` Սպիտակ տան մոտ

Միացյալ Նահանգների մայրաքաղաք Վաշինգտոնում նախագահ Դոնալդ Թրամպի նստավայրի՝ Սպիտակ տան առջեւ Ամերիկայի Հայ դատի հանձնախումբը շաբաթ երեկոյան մոմավառություն էր կազմակերպել՝ նվիրված Հայոց ցեղասպանության զոհերի հիշատակին:

«Մենք այսօր այստեղ ենք, որպեսզի մեր հարգանքի տուրքը մատուցենք մեր նախնիներին, այն հզոր մարդկանց, ովքեր գնացին բոլոր զրկանքների, մեր վերապրումն ապահովելու համար», - նշում է մոմավառության մասնակից Ռուբեն Սահակյանը։

Նրա խոսքով, մոմավառության նպատակն է նաեւ հիշեցնել Ամերիկային նրա ավանդական արժեքները․

«Հենց Ամերիկան ավելի քան 2 միլիարդ դոլար հանգանակեց 1915-1923-ին ցեղասպանություն վերապրած հայերին, հույներին եւ ասորիներին փրկելու համար, հենց Ամերիկան է ճանաչել Հայոց ցեղասպանությունը 1951-ին, 1975-ին, 1981-ին եւ 1985-ին»:

Հիշեցնենք, Հայոց ցեղասպանությունը պաշտոնապես իր հայտարարությամբ ճանաչած Միացյալ Նահանգների նախագահն էր Ռոնալդ Ռեյգանը։ Չգրված ավանդույթի համաձայն ԱՄՆ-ի նախագահը յուրաքանչյուր տարի ապրիլի 24-ին պաշտոնական հայտարարությամբ է հանդես գալիս, որը նվիրված է Առաջին աշխարհամարտի տարիներին Օսմանյան կայսրության տարածքում հայերի զանգվածային կոտորածներին․Միացյալ Նահանգների 44-րդ նախագահ Բարաք Օբաման իր հայտարարություններում կոտորածներն անվանել էր Մեծ եղեռն եւ նույնիսկ հիշատակել «ցեղասպանություն» եզրը ստեղծող՝ լեհ իրավագետ Ռաֆայել Լեմկինին։ Այդ մասին հայտնում է «Ամերիկայի ձայնը»:

Վաշինգտոնի Հայ դատի գրասենյակի գործադիր տնօրեն Արամ Համբարյանի խոսքով, նախագահ Թրամպի առջեւ պարզ ընտրություն է․

«Մենք այստեղ ենք, որպեսզի նախագահ Թրամփին ասենք, որ նա ընտրություն ունի ապրիլի 24-ին բարձրացնելու Ամերիկայի ձայնը եւ կանգնելու արդարության կողքին կամ կոծկելու այն Թուրքիայի ճնշման տակ»։

Հիշեցնենք, որ պաշտոնական Անկարան չի ճանաչում Հայոց ցեղասպանությունը, պնդելով, թե կոտորածները եղել են Առաջին աշխարհամարտի այլ ոչ թե ծրագրավորված պետական գործողությունների արդյունք։

Սպիտակ տան առջեւ մոմավառությունը սակայն Հայոց ցեղասպանության հիշատակի մի փոքր մասն է, նշում է Սարգիս Քահանա Ագթավուգյանը․

«Վաշինգտոնի հայ համայնքը ապրիլ ամսվա մեկ օր գալի է հավաքվում Սպիտակ տան առջեւ՝ հիշեցնելու համար նախագահին, որ մենք ցեղասպանություն ենք վերապրել եւ այդ ցեղասպանությունը, հակառակ նրան, որ նախկինում ամերիկյան նախագահները ընդունել են ցեղասպանությունը, սակայն վերջին մի քանի նախագահները անտեսում են այս իրականությունը»: