Տեսանյութ. Վլադիմիր Գասպարյանը խոսել է խոչընդոտների, 100%-ոց ոստիկանների և ծուլացածներին պաշտոնազրկելու մասին

Հուլիսի 14-ին տեղի ունեցավ ՀՀ ոստիկանության կոլեգիայի նիստը, որի ընթացքում ամփոփվեցին ոստիկանության ծառայությունների և տարածքային մարմինների 2017 թ. 1-ին կիսամյակի օպերատիվ-ծառայողական գործունեության արդյունքները:

Նիստը վարում էր ոստիկանության պետ, ոստիկանության գեներալ-գնդապետ Վլադիմիր Գասպարյանը:
Մասնակցում էին ոստիկանության կոլեգիայի անդամները, կենտրոնական ապարատի, Երևան քաղաքի և մարզային վարչությունների, տարածքային բաժինների պետերը:

Ոստիկանության մարմինների գործունեությունը դիտարկելով համակարգում ընթացող բարեփոխումների համատեքստում՝ Վլադիմիր Գասպարյանը կարևորեց գոծընթացի շարունակականությունն ու անցումը որակական ու խորքային փոփոխությունների:

«Տարին ամփոփելուց խոսել ենք այն մասին, որ 2018 թվականին պետք է մուտք գործենք 100 %-անոց շտկված, ձևափոխված, կերպարանափոխված, բարեփոխված ոստիկաններով, չնայած դրան շատ խոչընդոտներ կան: Այնուամենայնիվ, դա մեր ծրագիրն է և երկրորդ փուլը այնտեղ ավարտենք այդպիսի ցուցանիշներով: Մենք երրորդ եռամսյակին որոշումներ կկայացնենք անձնակազմի վերաբերյալ, իսկ հիմա կամփոփենք ու կնշենք այն թերությունները, ինչ մենք այս կիսամյակում դեռ ունենք ու մեզ խանգարում են: Երեք ամիս հետո կանդրադառնանք դրանց շտկման  եղանակները` էֆեկտիվ են եղել, թե` ոչ, շտկվել են, թե` ոչ, սուբյեկտիվ են, թե` օբյեկտիվ են այդ թերությունները: 9-րդ ամսում մենք որոշում կկայացնենք, թե ովքեր են մնում շարունակելու, ովքեր կամք ունեն շարունակելու բարեփուխմումների ծրագիրը, իսկ ովքեր դրա դրսևորումներում ծուլացած են հրաժեշտ կտան մեր համակարգին»,-իր խոսքում ասել է ոստիկանապետ Վլադիմիր Գասպարյանը: