Բաց նամակ Սերժ Սարգսյանին. պատժեք մեղավորներին

Հարգելի նախագահ,
Մտահոգված եմ հոկտեմբերի 2‑ին՝ ժամը 19:00‑ի սահմաններում, Տավուշի մարզում՝ Թումանյանից Բագրատաշեն տանող ճանապարահատվածի Հայաստան‑Վրաստան M6 միջպետական մայրուղու 86‑րդ կիլոմետրում, Այրում կայարանի մոտ, սողանքի հետևանքով ճանապարհամերձ սարի փլուզման փաստով, և այդ առիթով դիմում եմ ձեզ.

Սողանքի հիմնական պատճառը, նշված ճանապարահատվածի սպասարկող «Ճանշին» կազմակերպությունների, հանձինս ՀՀ տրանսպորտի նախարարության «Հայավտոճան» ՊՈԱԿ‑ի մեղքն է:

Ամենայն պատասխանատվությամբ հայտարարում եմ՝ ՀՀ տրանսպորտի նախարարության նախարար Մանուկ Վարդանյանն ի վիճակի չէ  վերահսկել   ճանապարհաշինարարության ոլորտը, նա իր ոչ մասնագիտական կարողություններով քայքայել է «Ճանշին» կազմակերպությունների աշխատանքը:

Ինչ վերաբերվում է ներկայիս «Հայավտոճան»ՊՈԱԿ‑ի տնօրեն, մանկապղծության մեջ մեղադրվող Սերոբ  Տեր‑Պողոսյանի քավոր` Հենրիկ Քոչինյանին, ցավով եմ նշում, որ նա նույնպես մասնագետ չէ և ոչ էլ առանձնակի ցանկություն է դրսևորում, որևէ բան անելու: Զարմանալի է, որ ստրատեգիական անչափ կարևոր այս ոլորտը վստահվել է Քոչինյան Հենրիկին այն դեպքում, երբ նա ոչ միայն մասնագետ չէ, այլև տարիներ շարունակ փոշիացրել է մի ողջ մարզի ռեսուրսները:

Լավագույն ելքը երկրի համար՝ նրանք երկուսն էլ  պետք է անհապաղ  հրաժարականի դիմում ներկայացնեն:

Որպես երկար տարիների փորձ ունեցող ճանապարհաշինարար, մերկապարանոց հայտարարություններ չանելու համար, բերեմ մի կոնկրետ օրինակ: Հիշեցնեմ, որ 2010 թվականին ՀՀ վերահսկիչ պալատը ստուգել է ՀՀ տրանսպորտի նախարարության իրականացրած ավտոմոբիլային ճանապարհների վերանորոգման 2007‑2008 թթ. իրականացված ծրագրերը: Նշված  ժամանակահատվածում իրականացվել է 5 միլիարդ 31 միլիոն դրամի  ճանապարհաշինարարական աշխատանքներ:

Արդյուքում պարզվել է, որ ընդհանուր` ավելի քան 354 միլիոն դրամի չափով խախտումներ են հայտնաբերվել` ծավալային հավելագրումների, անարդյունավետ ծախսերի և անորակ  աշխատանքներ կատարելու տեսքով: Արդյունքում` այդ ժամանակահատվածի «Հայավտոճան» ՊՈԱԿ‑ի տնօրեն` Կարեն Գևորգյանը, առանց քրեական պատասխանատվություն կրելու, իր դիմումի համաձայն ազատվել է աշխատանքից:

Իսկ ՀՀ վերահսկիչ պալատն ընդամենը գլուխ է գովում, որ յուրացված գումարներից ինչ-որ չնչին գումար հաջողվել է վերադարձնել պետբյուջե:

Կարեն Գևորգյանը (1998‑2010), քանդելով ճանշին համակարգը, իր գրպանած, շրջանառությունից ստացված եկամուտների մի մասը մուծում է պետբյուջե, իսկ  զգալի մասն օգտագործում իր կարիքների համար, իր թալանած գումարներով նույնիսկ սեփականաշնորհում է նախկին «ՀՀ ավտոմոբիլային ճանապարհների շինարարության և շահագործման» նախարարության շենքը, մայրաքաղաքի ուղիղ կենտրոնում հսկայական տարածքով մի շինություն, ձևակերպելով իր աղջկա անունով (հասցե` Կորյունի 21):

Ահա ՀՀ ավտոմոբիլային ճանապարհների վատ սպասարկման և վերանորգման հիմանական պատճառներից մեկը:

Հարգելի նախագահ, ես՝ որպես մասնագետ, վստահեցնում եմ՝ Հայաստանում սողանքները շատ են և դրանք լուրջ մոտեցման կարիք ունեն, որպեսզի չկրկնվի այս ողբերգությունը, ՀՀ ավտոմոբիլային ճանապարհների կառուցման վերանորոգման և նորմալ շահագործման համար կոչ եմ անում Հայաստանի Հանրապետությունում գտնվող իրեն հարգող ճանապարհաշինարարներին.

միավորվել և պահանջել կառավարությունից ՀՀ տրանսպորտի և կապի  նախարարության համակարգից հանել «ՀայավտոՃան» կազմակերպությունը և կցել կամ ՀՀ կառավարությանը, կամ ՀՀ նախագահին` որպես ստրատեգիական նշանակություն ունեցող առանձին միավոր:

Հ.Գ. Ի դեպ, ՀՀ գլխավոր դատախազությանը խնդրում եմ՝ վերը նշվածը ընդունել որպես հաղորդագրություն հանցագործության մասին և գործին պաշտոնական ընթացք տալ:

Վահան Առաքելյան
Երևանի թիվ մեկ «Ճանշին» վարչության պետ (1986‑2003թթ.)