Արայիկ Գրիգորյանի մեսիջը Նաիրա Զոհրաբյանին

Վերլուծական 3 Հոկտեմբեր, 2017 22:00

Այսօր ԱԺ-ում լրագրողները փորձեցին պարզել, թե ինչո՞ւ Արայիկ Գրիգորյանը լքեց Նաիրա Զոհրաբյանի նախագահությամբ գործող Եվրաինտերգրման հանձնաժողովը: «Ես չեմ լքել»,- պատասխանեց վերջինս: Հարցին, թե իրեն նկատողություն են արել, դրա համա՞ր է հեռացել հանձնաժողովից, Արայիկ Գրիգորյանը պատասխանեց. «Ինձ ոչ մեկ չի կարող նկատողություն անել»: Լրագրողները հետաքրքրվեցին՝ ընդհանրապե՞ս ոչ ոք: «Այո»,- պատասխանեց նա: Հարցին, թե արտոնյալ կարգավիճա՞կ ունի, նա պատասխանեց. «Վերջ տվեք, ամոթ ա»:

Հիշեցնենք, մամուլում տեղեկություն էր տարածվել, որ Արայիկ Գրիգորյանին, ՀՀԿ-ական պատգամավորներ Արկադի Համբարձումյանին և Աշոտ Արսենյանին դուր չի եկել Զոհրաբյանի նախազգուշացումներն առ այն, որ հանձնաժողովի նիստերին անհարգելի բացակայելու դեպքում աշխատավարձերից պահումներ կարվեն: Ու քանի որ Գրիգորյանը որոշել է խորհրդարանում արտոնյալ կարգավիճակում հանդես գալ, միևնույն ժամանակ աշխատավարձ ստանալ, դիմում է ներկայացրել հանձնաժողովից դուրս գալու մասին:

Ավշարի Արայիկի այսօրվա հայտարարությունը առաջին հերթին մեսիջ էր հենց Նաիրա Զոհրաբյանին: Զոհրաբյանը՝ անկախ քաղաքական և հանրային շրջանակներում նրա անձի վերաբերյալ հակասական վերաբերմունքից այն մարդն է, ով երկար տարիներ լրագրողական գործունեություն ծավալելով, քաջ ծանոթ է քաղաքականության բոլոր նյուանսներին, հասկանում է թե ինչ է ասել՝ քաղաքականություն ի տարբերություն ԱԺ-ում գտնվող շատ և շատ այլ պատգամավորների, որոնք մեղմ ասած չեմ համապատասխանում քաղաքական գործչի կերպարին: Ընդհանրապես, կարող ենք փաստել՝ Հայաստանում վերջին ընտրությունները վկայում են այն մասին,որ քաղաքական գործչի ինստիտուտը մեր երկրում վերջնականապես պարտվել է, քանի որ Հայաստանի քաղաքական համակարգը թևակոխել է մի փուլ, որտեղ գնահատման յուրահատուկ չափանիշ է հանդիսանում այն, թե ինչքան ձայն ես հավաքում հարազատ կուսակցությանդ համար: Եվ գուցե այս պարագայում Ավշարի Արայիկը խոսելու տեղ ունի, երբ իր բիզնեսից ստացված փողերով ընտրությունների ժամանակ Արարատի մարզում ՀՀԿ համար ապահովելով 45 339 ձայն՝ այժմ իրեն բարձր է դասում բոլորից, ոչ միայն Նաիրա Զոհրաբյանից: Նրա պահվածքը ամբողջությամբ տեղավորվում է մեր քաղաքական համակարգի տրամաբանության մեջ, երբ որ վճարում է, նա էլ պատվիրում է երաժշտությունը: Ստեղծված իրավիճակում ժողովրդի միջից ելած քաղաքական գործիչը ընտրություններում հաղթանակ տանելու համար կամ պետք է լինի իրապես ազնիվ, ապացուցի սեփական ժողովրդի մասին մտորելու, խորհելու իր ունակությունը, իր նվիրվածությունը, կամ նա պարզապես դատապարտված է ընտրություններում պարտվելու իրենց թաղամասի որևէ սուպերմարկետի տիրոջը...

Ստելլա Խաչատրյան