Քեֆչի հասանները...

Վերլուծական 3 Հոկտեմբեր, 2017 18:04

Շաբաթ օրը` սեպտեմբերի 30-ին, առավոտից ոստիկանական մեքենաները փակել էին Գառնիի հեթանոսական տաճար տանող ճանապարհը: Բոլորին ասվում էր, որ միջոցառում է տեղի ունենալու տաճարում, «ԻՆԳՈ ԱՐՄԵՆԻԱ» ապահովագրական ընկերությունը նշում է իր հիմնադրման 20-ամյակը: Զբոսաշրջիկներին Գառնի բերած ավելի քան 50 ավտոբուսի՝ գյուղի խաչմերուկից թույլ չտրվեց առաջ անցնել: Թերևս Արմեն Ամիրյանը՝ ով, հիշեցնենք, եթե մոռացել եք՝ ՀՀ մշակույթի նախարարն է և վերոնշյալ քեֆչի հասան «ԻՆԳՈ ԱՐՄԵՆԻԱ» ընկերության սեփականատեր՝ համատեղության կարգով ՀՀ առողջապահության նախարար Լևոն Ալթունյանը հենց այսպես են պատկերացնում Հայաստանը զբոսաշրջության կենտրոնի վերածելու՝ վարչապետի գաղափարը:

Հետաքրքիր է, ի վերջո, զբոսավարներին հաջողվե՞ց աշխարհի տարբեր երկրներից ժամանած ապշահար զբոսաշրջիկներին բացատրել, թե ինչ կարեւոր դերակատարություն ունի մեր երկրի կյանքում այդ ապահովագրական ընկերությունը, պետական ինչ կարեւորության իրադարձություն է նրա 20-ամյակը, որի «փարթին» պետք է նշվի Գառնի պատմամշակութային արգելոց-թանգարանում: Նրանց հաջողվե՞ց բացատրել, որ Գառնիի հեթանոսական տաճարը լավ գումարի դիմաց «փակել է տվել» մի կազմակերպություն: Աշխարհի որևէ այլ երկրում նման բան անգամ չես կարող պատկերացնել, ուր մնաց՝ օրը ցերեկով ականատես լինես: Հետո էլ զարմանում ենք՝ ինչու մեր պատմամշակութային կոթողները ՅՈՒՆԵՍԿՕ-ին, մեղմ ասած, չեն հետաքրքրում: Ի՞նչ է, Ամիրյանին հետաքրքրո՞ւմ են: Ամիրյանը վերջին շրջանում զբաղված է միայն նոր սրճարանների, սաունաների և խորովածանոցների համար հարմար վայր փնրտելով, իսկ դե Ալթունյանի մասին լռենք՝ քանի որ վերջինիս բիզնես հոտառությանը կնախանձեր ինքը Բիլլ Գեյթսը: Ու քանի դեռ անհույս հիվանդները փող են կուտակում վիրահատության համար, քանի դեռ մարզերի բնակիչները կրակն են ընկել փինաչի բժիշկների ձեռքը, իսկ ճնշման տատանումներից ուշաթափվողը նախ ստուգում է դրամապանակի պարունակությունը, ապա նոր զանգում 1-03՝ Ալթունյանը փարթիների մեջ է…

Ստելլա Խաչատրյան