Անվտանգության ապահովո՞ւմ, թե՞ բիզնես պլան

Գաղտնիք չէ, որ ներկայում հանրապետությունում բազմաթիվ առաջնային նշանակության խնդիրներ կան չլուծված. խնդիրներ, որոնք իրենց լուծմանն օր առաջ են սպասում, բայց որոնք այդպես էլ լուծում չեն գտնում: Բայց արի ու տես, որ այդ առաջնային խնդիրները թողած՝ Տրանսպորտի և կապի նախարարը լծվել է մեկ այլ՝ առաջին հայացքից հապշտապ լուծում չպահանջող խնդրի լուծմանը: Խոսքը, մասնավորապես, նախարար Վահան Մարտիրոսյանի՝ աջակողմյան ղեկերով մեքենաներն արգելելու առաջարկի մասին է, որը լուրջ քննարկման առարկա է դարձել հանրության շրջանում:

Շատ-շատերը գտնում են, որ նախարարության առջև այսօր ավելի լուրջ խնդիրներ կան ծառացած, քան մեքենաների ղեկերի տեղի և դերի մասին մտածելը: Օրինակ՝ տրանսպորտի նախարարությունը կարող էր ի վերջո ավարտին հասցնել հյուսիս-հարավ ավտոճանապարհի կառուցումը, որի ոդիսականի վերջը դեռևս չի երևում: Այն, որ մեր երկրում կամայական փոփոխությունբեր են արվում՝ ելնելով փոքր խմբերի շահերից՝ գաղտնիք չէ: Այս անգամ էլ կասկածներ կան, որ մտահոգության բուն առարկան ոչ թե քաղաքացիների, վարորդների անվտանգությունն է, այլ այն, որ աջակողմյան ղեկով մեքենաները գուցե և խփում էին որոշ շրջանակների բիզնես շահերին: Մյուս կողմից, որոշ հաշվարկներով, Հայաստանում կան տասնյակ հազարների հասնող աջ ղեկով մեքենաներ, և նրանց ղեկի տեղափոխման վրա մեծ գումարներ կարելի է աշխատել: Մինչ օրենքի ուժով աջ ղեկով մեքենաների շահագործման արգելումը՝ հնարավոր է ստեղծել մեքենաների ղեկի փոփոխության ծառայություն մատուցող ընկերություններ, որոնք և կաշխատեն միլիոններ՝ նոր օրենքի շնորհիվ: Իհարկե, այս ամենն ընդամենը ենթադրություններ են, մտորումներ՝ թե ինչու է նախարարությունը, գիտակցելով հանրային դժգոհությունը, այդքան մեծ կարևորություն և առաջնայնություն տալիս այս նախագծին, երբ ոլորտում օր առաջ լուծման կարոտ բազմաթիվ խնդիրներ են կուտակվել: Ինչպես ասում են՝ ծուխն առանց կրակ չի լինում…

Ստելլա Խաչատրյան