Ի՞նչ են դնելու աստղերն ամանորյա սեղանին. յուրահատուկ բաղադրատոմս՝ Արամեի կնոջից

BlogNews.am-ը շարունակում է իր ընթերցողներին ներկայացնել այն հայտնի գեղեցկուհիներին, որոնք տոներին ընդառաջ առաջարկում են ամանորյա ճաշատեսակների իրենց բաղադրատոմը: Այս անգամ հյուրընկալվել ենք Արամեին ու Աննա Թովմասյանին: Գաղտնիք չէ, որ Աննան խոհանոցի նկատմամբ անտարբեր չէ: Նա  հաճախ է իր Instagram-ում հոլովակներ ներկայացնում, որտեղ քայլ առ քայլ ցուցադրում է ինչպես ստանալ ցանկալի արդյունքը: Տոնական սեղանի ճաշատեսակներից լավագույնը Աննան օրերս պատրաստել է հատուկ BlogNews.am-ի համար: Ներկայացնում ենք գեղեցիկ ֆոտոշարքն ու յուրահատուկ բաղադրատոմսը, որն Աննան խորհուրդ է տալիս համտեսել Սուրբ ծննդյան տոներին: Ի դեպ՝ սա առաջին դեպքն էր, երբ հայտնի ամուսինները համաձայնել են իրենց տանը լրատվամիջոցի ներկայացուցչի հյուրընկալել:

Բաղադրությունը

Ձուկ՝ 1 կգ

Բրինձ՝ 0.5 կգ

Պանիր «Ռոքվոր»՝ 200գ

Սերուցք՝ 200գ

Կարմիր և սև պղպեղ

Աղ

Բուսայուղ

Ռեհան

Պատրաստման եղանակը

Ձուկը համեմում ենք աղով և պղպեղով և թողնում 15 րոպե, որպեսզի մարինացվի, հետո տեղափոխում ենք ջեռոց և 180 աստիճանի տակ տապակում: Այդ ընթացքում խաշում ենք բրինձն ու պատրաստում «Պանտի» սոուսը: Պանիրն ու սերուցքը հարում ենք ու ավելացնում ռեհան:

Նախկինում լավագույն բանը, որ կարողանում էի պատրաստել, ձվածեղն էր։

Մինչև ամուսնությունս ոչ մի առնչություն չեմ ունեցել խոհանոցի հետ, լավագույն բանը, որ կարողանում էի պատրաստել, ձվածեղն էր, սակայն ամուսնությունից հետո ամեն ինչ 180 աստիճանով փոխվեց. Արամեն շատ է սիրում համեղ ուտել, և ինձ մոտ մոտիվացիա առաջացավ պատրաստելու սիրելիիս համար: Արամն ամեն անգամ փորձելուց հետո այնքան բուռն էր արձագանքում, այնքան էր հավանում՝ իմանալով, որ պատրաստելուց իրականում հեռու եմ: Այդ փաստ ինձ շատ ոգևորեց: Անգամ երբեմն ես էի զարմանում իմ պատրաստած ճաշատեսակների համից:

Առաջին անգամ բորշչը պատրաստել եմ հեռախոսով՝ մայրիկիս օգնությամբ։

Համեղ պատրաստելը սովորել եմ մայրիկիցս: Նա շատ համեղ ձեռք ունի, ու դա միայն ես չեմ ասում: Առաջին անգամ մայրիկիս օգնությամբ հեռախոսով բորշչ եմ պատրաստել: Նա թելադրում էր ինչը ինչի հետ խառնել, ինչպես անել, մինչև սովորեցի: Բայց, իհարկե, վերջնական արդյունքն իմ բերանի համով ստացա: Արամեն ասում է, որ իմ համային զգացողությունն ուրիշ է: Սիրում եմ ցանկացած ճաշատեսակ տարբեր եղանակներով պատրաստել ու ոչ ստանդարտ մոտեցում ցուցաբերել: Հաջորդ անգամ արդեն իսկապես զարմացրի Արամին՝ պատրաստելով այն բորշչը, որը նա Ուկրանիայում էր փորձել: Ասեմ, որ իսկապես շատ համեղ էր ստացվել: Պարզվում է՝ նրանք մթերքները շոգեխաշում են, ինչն էլ յուրահատուկ համ է տալիս: Մեր իմացած բորշչի պատրաստման եղանակից բավականին տարբերվում է: Մենք հայկական խոհանոցի սիրահարներ ենք, ու մեզ մոտ հիմնականում գերիշխում են մսային ճաշատեսակները:

Արամեն տան ուտելիքը ոչ մի ռեստորանի ճաշացանկի հետ չի փոխի։

Սովորաբար սիրում ենք տանը սնվել, Արամեն՝ առավել ևս: Նա հազվադեպ է դրսում ճաշում: Ասում է՝ ես տան ուտելիքը ոչ մի ռեստորանի ճաշացանկի հետ չեմ փոխի: Իհարկե, մենք հաճախ նաև դրսում ենք սնվում, երբ ընկերների հետ ենք հավաքվում: Ուտելիքի մեջ ինձ համար կարևոր է ոչ միայն համը, այլև տեսքն ու մատուցման եղանակը: Անկեղծ կասեմ՝ ես գեղեցիկ սպասքի հանդեպ թուլություն ունեմ:)

Հաշված օրեր են մնացել Ամանորին, բայց մեզ մոտ կարծես թե այդ տոնական աժիոտաժը չի զգացվում։

Առաջվա համն ու հոտը չի մնացել, մեր մանկության տարիներին ամեն ինչ ուրիշ էր: Հիշում եմ՝ մենք սրտատրոփ սպասում էինք՝ Նոր տարին երբ է գալու: Այսօր ամեն ինչ կարելի է խանութից պատրաստի գնել ու վերջ, ինչը արհեստական է դարձնում տոնը: Ճիշտ է, ավելի դժվար է եղել նախկինում, բայց մեր ծնողներն այնքան հաճույքով էին անում այդ ամենը, ջանք չէին խնայում, որ սեղանը ճոխ ու գեղեցիկ լիներ, իսկ հիմա ամեն ինչ հեշտացել է ու միաժամանակ կորցրել նաև իր իմաստը: Մեր ամանորյա սեղանի զարդը, ինչպես բոլոր հայկական ընտանիքներում, խոզի բուդն է: Բայց շատ ենք սիրում նաև նրբաբլիթ (բլինչիկ), պասուց դոլմա և անպայման այս օրերին պատրաստելու ենք:

2017-ը «խեղճ ու կրակ» Ամանոր էր

Հիմանակում չի ստացվում Ամանորի գիշերը տանը դիմավորել: Արամեն աշխատանքի է լինում, իսկ ես էլ սիրում եմ ուղեկցել նրան: Այսքան ժամանակ մեր ամենահիշվող Ամանորը եղել է Պարսկաստանում: Ամենատխուր Նոր տարին էր, որ երբևէ ունեցել էինք: Արամեի ելույթից հետո մենք բարձրացանք հյուրանոցի սենյակ, որտեղ մեզ համար բերեցին հյութ և մի փոքր բրինձ ու պյուրե: Տխուր դեմքերով ֆոտո էինք արել և ուղարկել մեր ընկերներին, որ տեսնեին՝ ինչ «շքեղ» ձևով ենք նշում (ծիծաղում է): Այս տարի ևս Արամը Պարսկաստանում է լինելու, բայց ես նախընտրեցի իրեն չուղեկցել՝ անցյալ տարվա դառը փորձն ուենալով:

Հավատում եմ Ամանորի կախարդական գիշերվա հեքիաթին

2017-ն իմ կյանքի լավագույն տարիներից մեկն էր. թե՛ աշխատանքի, թե՛ ստեղծագործական առումով այս տարին լավագույններից էր մեզ համար, բայց առավել կարևորը մեր բալիկի՝ Աննա Մարիայի, գոյության փաստն էր: Նա լցրեց մեր կյանքը գույներով ու իմաստ հաղորդեց: 2018-ից էլ մեծ սպասելիքներ ունեմ ու հավատում եմ, որ Ամանորի կախարդական գիշերը երազանքներս անկատար չեն մնա: