ՀՀ պաշտպանության նախարարն այցելել է «Միր» միջպետական հեռուստառադիոընկերության ազգային մասնաճյուղ

 ՀՀ պաշտպանության նախարար Վիգեն Սարգսյանը դեկտեմբերի 27–ին այցելել է «Միր» միջպետական հեռուստառադիոընկերության ազգային մասնաճյուղ և շնորհավորել անձնակազմին հեռուստառադիոընկերության հիմնադրման 25–ամյակի կապակցությամբ։

Ինչպես ԼՈՒՐԵՐ.com-ին տեղեկացրին ՀՀ պաշտպանության նախարարության տեղեկատվության և հասարակայնության հետ կապերի վարչությունից, այցելության ընթացքում Վիգեն Սարգսյանը ծանոթացել է ընկերության տեխնիկական հնարավորություններին, աշխատանքային պայմաններին և զրուցել մասնաճյուղի աշխատակիցների հետ:

Հեռուստառադիոընկերության հայաստանյան մասնաճյուղի տնօրեն Մերուժան Սարգսյանը պաշտպանության նախարարին ներկայացրել է պատրաստվող հեռուստաարտադրանքը, սփռման ծավալները, եթեր հեռարձակվող հաղորդումների բովանդակությունը, ինչպես նաև ապագա ծրագրերը։

Մերուժան Սարգսյանը պաշտպանության նախարարին է հանձնել «Միր» միջպետական հեռուստառադիոընկերության ղեկավարության շնորհակալական նամակը և հուշամեդալը։

Այցի ավարտին Վիգեն Սարգսյանը պատասխանել է նաև ընկերության լրագրողների հարցերին։