Բեռը թողեցին Արամյանի ուսերին ու թռան

Ինչպես գիտենք, այս տարվա հունվարի 10-ին նախագահ Սերժ Սարգսյանը Բաղրամյան 26-ում խորհրդակցություն էր անցկացրել թանկացումների կամ գնաճի թեմայով, որին ներկա էին ԿԲ նախագահը, փոխվարչապետը, ՊԵԿ ղեկավարը, ՏՄՊՊՀ նախագահը և պատկան մարմինների այլ բարձրաստիճան ներկայացուցիչներ: Այս հանդիպմանը նախագահ Սարգսյանը խստիվ կարգադրեց ամենալուրջ մոտեցումը ցուցաբերել գնաճի զսպման մեխանիզմների որոնմանը և այս առիթով հրավիրել խորհրդարանական լսումներ: Բաղրամյան 26-ում տեղի ունեցած խորհրդակցությանը հաջորդեց ընդդիմության երթը ընդդեմ թանկացումների, որին բազմաթիվ քաղաքացիներ միացան: Ամեն ինչ հուշում էր, որ հենց իշխանությունների շահերից է բխում ամենայն լրջությամբ մոտենալ նախագահի հանձնարարականի կատարմանը: Այն, իհարկե, կատարվեց: Այլ հարց է՝ ինչպես: Երեկ ԱԺ-ում հերթական անգամ ականատես եղանք՝ ինչպես օրենսդիրն իր դռները բացեց իշխանության կրկեսային խմբի առաջ, որն էլ մի անհավանական ներկայացում բեմադրեց՝ վերջին ամիսների գնաճի օբյեկտիվության, անգամ օգտակարության մասին։ ՊԵԿ-ը, որը ԱԺ էր բերել գնաճի հիմնական պատճառ հանդիսացող նոր Հարկային օրենսգիրքը, այս լսումներին ներկայացել էր փոխնախագահի մակարդակով, փոխվարչապետը և Էկոնոմիկայի նախարարը, ըստ ամենայնի, առկա գնաճը այնքան էլ սարսափելի չէին համարել և զլացել էին անգամ ներկայանալ նիստերի դահլիճ: ՏՄՊՊՀ նախագահի ելույթն ամբողջությամբ հիմնավորում էր այն, թե ինչու գնաճի դեմ պայքարել հնարավոր չէ, նույնիսկ՝ օգտակար չէ: ԿԲ նախագահը չցանկացավ խոսել թվերով, փոխարենը մտավ Շաբոյանենց «դուքանը»՝ ներկայացնելով կարագի և ձեթի շուկայում իր կատարած մոնիտորինգի արդյունքները: ԱՎԾ պետն էլ միայն ֆիզիկապես էր պատվել լսումները:

 

 

Ստելլա Խաչատրյան