Զուրաբյանը համամիտ է ՀՀԿ պատգամավորի հետ

ՀԱԿ-ի համակարգող Լեւոն Զուրաբյանը չի կիսում այն քաղաքական ուժերի տեսակետը, թե ՀԱԿ-ն իր շուրջօրյա հանրահավաքները դադարեցնելով՝ համակիրներ է կորցրել: «Ես ծանոթ չեմ քաղաքական ուժերի արձագանքներին ծանոթ չեմ, որովհետեւ չեմ տեսնում որեւէ կարեւոր քաղաքական ուժ, որի կարծիքը պետք է հաշվի առնել»,- այսօր «Ա1+»-ին ասաց պարոն Զուրաբյանը: Ըստ նրա՝ ՀԱԿ-ը կանխատեսում է, որ իշխանությունները հաշվի չեն առնելու իրենց պահանջները: Բոլոր դեպքերում Լեւոն Զուրաբյանը գտնում է, որ 8 օրյա հանրահավաքի ընթացքում ՀԱԿ-ը կարեւոր ձեռքբերումներ է ունեցել եւ դրանից առանձնացրեց 3-ը. «Մենք իսկապես կոտրեցինք 2008թ. մարտի 1-ի ջարդով ժողովրդի մեջ առաջացած վախը եւ ապացուցեինք, որ կարող ենք ընդարձակել ազատության սահմանները եւ իշխանությունները չհամարձակվեցին ուժային մեթոդներ կիրառել: Հեշտ չէր ստեղծել ստեղծել այն քաղաքական մթնոլորտը, որ բացառվեր իշխանությունների միջոցով ուժային լուծումներ»:

Երկրորդ կարեւոր ձեռքբերումը Լեւոն Զուրաբյանը համարում է ՀԱԿ-ի համակիրների շրջանակի ընդլայնումը. «8 օրյա հանրահավաքների ընթացքում տարբեր ժամերին մոտ 100 հազար մարդ է մասնակցել: Մենք ստացանք նոր ալիք ժողովրդին քաղաքական գործընթացներում ներգրավելու համար եւ մեր ուղերձները հասցրեցինք առավելագույն քանակով մարդկանց»: Երրորդ ձեռքբերումը, ըստ Լեւոն Զուրաբյանի, այն է, որ ՀԱԿ-ը ապացուցեց, որ գործող վարչախումբն իշխանությունը կարողանում է պահել միայն բիրտ ուժի միջոցով. «Դա այս ռեժիմի գլխավոր պարտությունն է: Իշխանությունները ստիպված էին 8 օր շարունակ բլոկադայի ենթարկել սեփական բնակչությանը՝ կտրելով մարզերը Երեւանից: 8 օր շարունակ չի գործել տրանսպորտը, ամենաստոր մեթոդներն են կիրառվել այդ բլոկադան կիրառելու համար»:

Անդրադառնալով ՀՀԿ պատգամավոր Մկրտիչ Մինասյանի այսօր այն հայտարարությանը, թե Սերժ Սարգսյանի հրաժարականի մասին ՀԱԿ-ի պահանջը որեւէ կերպ չի կարող քննարկման առարկա լինել՝ պարոն Զուրաբյանն ասաց.«Ես լրիվ համաձայն եմ այդ պատգամավորի հետ: Սերժ Սարգսյանի հրաժարականը չի կարող դառնալ որեւէ քննարկման համար: Քննարկումներ կարող էին լինել, եթե մենք իշխանությունների հետ համաձայնեցնեինք նախագահական եւ խորհրդարանական արտահերթ ընտրությունների անցկացման պայմաններն ու ժամկետները: Մենք այլեւս անիմաստ ենք համարում այս իշխանությունների հետ որեւէ քննարկումը: Նրանք ցույց տվեցին, որ ի վիճակի չեն ընդդիմության հետ միասին կառավարել անցումը դեպի ժողովրդավարությունը»:

Լեւոն Զուրաբյանը հայտարարեց, որ ՀԱԿ-ը պահանջում է Սերժ Սարգսյանի հրաժարականը եւ իշխանություններն այլեւս որեւէ մասնակցություն չեն ունենալու այդ գործընթացում. «Ժողովուրդն է ասելու իր խոսքը»: