ԱՄՆ-ի նոր հարվածը՝ Ներդրողների ակումբին

Վերլուծական 30 Հունվար, 2018 17:31

ԱՄՆ-ի ֆինանսների նախարարությունը պատրաստել է պատժամիջոցների նոր օրենքով նախատեսված «կրեմլյան ցուցակը», հայտնում է Bloomberg-ը: Ցանկում ընդգրկված է 96 գործարար, որոնց կարողությունը գերազանցում է 1 միլիարդ դոլարը և 116 պաշտոնյա: Ռուս օլիգարխների ցանկում ընդգրկված են նաև «Տաշիր» ընկերության սեփականատեր Սամվել Կարապետյանը և «Ռոսգոսստրախ»-ի ղեկավար Դանիլ Խաչատուրովը, ինչպես նաեւ հայազգի Սերգեյ Գալիցկին: Օբյեկտիվորեն Ռուսաստանում գրեթե չկան մաքուր փողեր ունեցող հայ խոշոր գործարարներ, և մեծահարուստ ցանկացած ռուսաստանահայ՝ այս ցուցակի պոտենցիալ «հաճախորդ» է: Ոչ թե մեր հայրենակիցներն են վատը կամ ռուսաստանցի մյուս գործարարները, այլ համակարգը, որը փչացնում է գործարարներին, հասարակության բոլոր այն խմբերին, որոնց գործունեությունն ինչ-որ կերպ կապված է իշխանության, ըստ էության` կոռուպցիոն համակարգի հետ:

Հիշեցնենք, որ ավելի վաղ ԱՄՆ ֆինանսների նախարարությունը պատժամիջոցներ էր սահմանել Ռուսաստանի իշխանություններին մոտ կանգնած 10 քրեական հեղինակությունների դեմ: Նոր պատժամիջոցների ցուցակ է սպասվում մինչև 2018 թվականի փետրվարի վերջ։ Պատժամիջոցների նոր ցանկում են հայտնվել Ռուսաստանի էներգետիկայի նախարարության մի շարք բարձրաստիճան պաշտոնյաներ, «Технопромэкспорт», «Силовые машины» ընկերությունները, երկրի խոշորագույն էներգետիկ ընկերություններից մեկի` «Сургутнефтегаз»-ի դուստր ձեռնարկություններից մի քանիսը, ինչպես նաև ՌԴ էներգետիկայի նախարարի տեղակալ Անդրեյ Չերեզովը և նախարարության դեպարտամենտի նախագահ Եվգենի Գրաբչակը:

Ցանկացած տնտեսական խնդիր, որն առաջանում է Ռուսաստանում, անուղղակի ազդեցություն կարող է ունենալ նաև Հայաստանի տնտեսության վրա: Մենք ունենք երկու միլիարդ բանկային համակարգով Ռուսաստան մուտք գործող տրանսֆերտներ, և բանկային ոլորտում Ռուսաստանի նկատմամբ կիրառվող պատժամիջոցների պատճառով մենք կարող ենք ունենալ որոշակի ֆինանսական ռեսուրսների կորուստ: Ամերիկյան պատժամիջոցային քաղաքականությունը կարող է ավելի ծանր հետեւանքներ ունենալ Հայաստանի համար, քան որոշ մեծահարուստ ռուսահայերի ունեցվածքի կալանումն է: ԱՄՆ իշխանությունները մտադիր են պատժամիջոցներ կիրառել ոչ միայն ռուսական ընկերությունների, այլ նաեւ նրանց դուստր կազմակերպությունների նկատմամբ, այն կազմակերպությունների, որոնք ինչ-որ առնչություն ունեն Ռուսաստանի հետ: Սա նշանակում է, որ ԱՄՆ-ի պատժամիջոցների տակ կարող են հայտնվել ռուսական բանկերի հայաստանյան մասնաճյուղերը, ռուսական կապիտալով հայկական բանկերը եւ ընդհանրապես բոլոր այն ընկերությունները, որոնք ինչ-որ կերպ առնչվում են Ռուսաստանի հետ:

Սակայն Հայաստանի համար գլխավոր մարտահրավերը կայանում է նրանում, որ այս անգամ ԱՄՆ պատժամիջոցների գլխավոր թիրախն էներգետիկ ոլորտն է և այն պաշտոնյաները, որոնք այս կամ այն կերպ ներգրավված են դրանում: Սամվել Կարապետյանը հանդիսանում է վարչապետի ստեղծած Ներդրողների ակումբի անդամ, իսկ այս ակումբը, ինչպես գիտենք, գլխավոր ներդրումային ոլորտ է դիտարկում հենց էներգետիկան: Սանկցիաների կիրառման դեպքում կասկածի տակ կդրվի ոչ միայն արդեն իսկ խոստացված 1 միլիարդ դոլարի ներդրումային ծրագիրը, այլև ակումբի հետագա ողջ գործունեությունը: Հայաստանի ճակատագիրը, առնվազն տնտեսության, կապիտալի մի զգալի մասով կախված է ցանկում ներառված մարդկանց հետագա վարքագծից: Եթե նրանք կամք գտնեն տարածություն պահելու պուտինյան քաղաքականությունից, ապա չեն թիրախավորվի թե՛ իրենք, թե՛ Հայաստանը: Մյուս հանգամանքն այն է, որ այս մարդիկ, մասնավորապես՝ Սամվել Կարապետյանը, ներգրավված են նաև Հայաստանի իշխանության ձևավորման գործընթացում, և ըստ այդմ՝ վարքագծի փոփոխությունն անկասկած ուղիղ ազդեցություն է ունենալու նաև այդ գործընթացի վրա:

Ստելլա Խաչատրյան