Բանակի և հասարակության կապի ամրապնդման համար գրողներն արժանացան ՊՆ-ի և ՀԳՄ-ի մրցանակներին
Գիտություն և Մշակույթ
Բանակ-
«Այն պետությունը, այն ժողովուրդը, որը չունի բանակ, չի կարող ունենալ տնտեսություն, մշակույթ, գրականություն, առհասարակ` ոչինչ: Մեր անկախ հանրապետության լավագույն ձեռքբերումը հայոց բանակն է, որն ամեն օր, ամեն ժամ հզորացնել է պետք: Բանակը միայն զենքը չէ. դրան առաջին հերթին զորավիգ է ժողովրդի խոսքը, լեզուն, գրականությունը: Ուրախ եմ, որ այս մրցանակաբաշխությունը ընդլայնվում է. մասնակցում են գրողներ Հայաստանի տարբեր մարզերից: Գրողները տարեցտարի ավելի լրջորեն են պատրաստվում մրցանակաբաշխությանը: Ըստ իս` սա նրանց համար ամենապատվավոր մրցանակն է»,- նշեց Հայաստանի գրողների միության նախագահ Էդվարդ Միլիտոնյանը:
Մրցանակաբաշխության հանձնաժողովի նախագահ, բանաստեղծ, թարգմանիչ Շանթ Մկրտչյանի խոսքով` արդեն երրորդ տարին է իրականացվում այս միջոցառումը: «Առաջին տարվանից մինչ օրս բավականին մեծ փոփոխություններ են նկատվում. հեղինակներն առավել պատասխանատվությամբ են ներկայանում մրցույթին»,-ասաց նա: Մկրտչյանը հավելեց`հանձնաժողովի անդամները անաչառ են եղել և ըստ արժանվույն գնահատել բոլորին:
Հատուկ մրցանակը հանձնվեց Զորի Բալայանին հայ գրականության մեջ ունեցած հսկայական ներդրման համար:
Գեղարվեստական արձակ ժանրում առաջին մրցանակի արժանացավ Կոմիտաս Դանիելյանը «Երկհատորյակ» գրքի համար, երկրորդ մրցանակի արժանացան Գագիկ Խաչատրյանը «Զինվորի վերադարձը» և Վրեժ Սարուխանյանը «Տարոնականչ» պատմվածքների ժողովածուհի համար, երրորդ մրցանակը տրվեց Ժաննա Հակոբյանին «Ապրիլյան հերոսամարտ» վիպակի համար:
Պոեզիայի ասպարեզում առաջին, երկրորդ և երրորդ մրցանակների արժանացան բանաստեղծներ Գագիկ Սարոյանը Բանաստեղծական շարքի, Նորայր Գրիգորյանը «Խրամատի թաց պատին» ստեղծագործության, Դարիկո Խաչատրյանը «Նավարկումի զարկերակ»-ի, Անահիտ Թարյանը «Ես քո զինվորն եմ, Հայաստան» գրքի, Սամվել Մարգարյանը «Սխրանք» շարքի և Հրանուշը իր բանաստեղծությունների համար:
Հրապարակագրություն, գրաքննադատություն ժանրում մրցանակների արժանացան Հակոբ Հարությունը «Պրոմեթևսն է առաջին կամավորը», «Լռության դափնիներով զինվորները» գործերի, Տիգրան Նիկողոսյանը հայ զինվորին նվիրված հրապարակումների ցանկի, Քնար Թադևոսյանն իր հոդվածաշարի, Ռուզաննա Մկրտչյանը «Արագածոտնի մարզի անմահացած հերոսները քառօրյա պատերազմում», «Մռայլ երկինք-շանթահարված երկիր»-ի համար:
Հայոց բանակին նվիրված գրական-տեսական աշխատություն մրցանակը հանձնվեց Նորայր Ղազարյանին «Զինվորագրյալ բանաստեղծական շարքեր»-ի համար:
Խրախուսական մրցանակների արժանացան Լիանա Մայիլյանը՝ «Ես մնում եմ, մամ» պատմվածքի, Տաթև Սուքիասյանը՝ «Հայրենիքը սկսվում է սահմանից» վիպակի, Սաթենիկ Ղազարյանը՝ «Ապրիլյան» պատմվածքի, Լուսիկ Մկրտչյանը՝ «Քեզ հետ եմ, զինվոր»-ի, Արմենուհի Սիսյանն՝ իր բանաստեղծությունների համար և Ժաննա Աբրահամյանը:
Պարգևները հանձնեցին Հայաստանի գրողների միության նախագահ Էդվարդ Միլիտոնյանը և ՀՀ ՊՆ տեղեկատվության և հասարակայնության հետ կապերի վարչության պետ Արթուր Ավագյանը:
ՈՒՂԻՂ ԵԹԵՐ
Ամենադիտված 
Ուսանողը ատամի ցավով դիմել է ատամնաբույժի և անսպասելիորեն իմացել ծանր ախտորոշման մասին
