Ֆրանկոֆոն համալսարանների ռեկտորները կայցելեն Երևան. դեսպան Մինասյանն ընդունել է AUF-ի տարածաշրջանային տնօրենին

 Ռումինիայում ՀՀ դեսպան Սերգեյ Մինասյանը հունվարի 30-ին ՀՀ դեսպանությունում ընդունել է Ֆրանկոֆոնիայի համալսարանական գործակալության (L’Agence universitaire de la Francophonie-AUF) տարածաշրջանային տնօրեն Մոհամեդ Կետատային:

Ինչպես ԼՈԻՐԵՐ.com-ին տեղեկացրին ՀՀ արտաքին գործերի նախարարության մամուլի, տեղեկատվության և հասարակայնության հետ կապի վարչությունից, հանդիպման ընթացքում քննարկվել են Ֆրանկոֆոն տարածքում համագործակցության ընդհանուր հարցեր. հատուկ անդրադարձ է կատարվել համալսարանական ոլորտում համատեղ միջոցառումների անցկացման հնարավորություններին և համագործակցության հեռանկարներին:

Կողմերն անդրադարձել են Երևանում կայանալիք գագաթաժողովից առաջ AUF-ի նախաձեռնած ֆրանկոֆոն համալսարանների ռեկտորների՝ Երևան այցի ծրագրին և կազմակերպչական հարցերին:

Մոհամեդ Կետատան ՀՀ դեսպանին հայտնել է, որ մոտ ժամանակներս ծրագրվում է նաև իր այցը Հայաստան, ուր նախատեսվում են մի շարք հանդիպումներ տարբեր պաշտոնյաների հետ: 

Կողմերը պայմանավորվել են պահպանել կանոնավոր շփումները՝ քննարկումները շարունակելու նպատակով: