Թանգարանների ռեկորդակիրը՝ Լուվրը (լուսանկարներ, տեսանյութ)

Տեսանյութեր 14 Օգոստոս, 2018 17:43

«Լուվրը» սաքսոներեն է, նշանակում է «ամուր կառույց»:

XII դարի վերջին` Ֆիլիպ Ավգուստ թագավորի հրամանով, Սենայից ոչ հեռու կառուցվել է հզոր մի ամրոց՝ Փարիզը սաքսերի հարձակումից պաշտպանելու նպատակով, որը հետագայում վերակառուցվել է դղյակի: XIV դարում ամրոցը Կառլոս V Իմաստունի նստավայրն էր:

1546–74 թթ-ին Ֆրանցիսկ I թագավորի հրամանով դղյակի տեղում ճարտարապետ Պիեռ Լեսկոն Վերածննդի ոճով կառուցել է թագավորական պալատը, որը քանդակազարդել է Ժան Գոժոնը: Այժմ պալատը Լուվրի քառակուսի բակի մի մասն է:

XVI դարի 2-րդ կեսին կառուցվել են պալատի Փոքր և Մեծ սրահները, որտեղ բնակվել են նկարիչներ, ոսկերիչներ, ստեղծվել են գորգագործական արհեստանոցներ, իսկ ավելի ուշ՝ նաև տպարան:

1624 թ-ին ճարտարապետ Ժակ Լեմերսիեն կառուցել է «Ժամացույցների տաղավարը», իսկ Լուի Լևոն կառուցապատել է բակը և ձևավորել ներքին ճակատները: 1661 թ-ին Փոքր սրահը վերակառուցվել է Ապոլլոնի սրահի, որի ներսը ձևավորել է նկարիչ Շառլ Լեբրենը:

1667–74 թթ-ին ճարտարապետ Կլոդ Պեռոն դասական ոճով կառուցել է Լուվրի արևելյան ճակատը և սյունաշարը: Լուվրի շինարարությունն ավարտվել է 1850-ական թականներին, երբ ճարտարապետներ Լուվր Վիսկոնտին և Լեֆյուելը պալատական համալիրին կից կառուցել են այսպես կոչված Նոր Լուվրը, որի 2 մասնաշենքերը հյուսիսից շրջապատել են համալիրը՝ Մեծ սրահի երկայնքով:

Այժմ Լուվրի գլխավոր մուտքն ապակեպատ Մեծ բուրգն է, որը կառուցված է 673 ապակե թիթեղներով: (1989 թ., ճարտարապետ՝ Յոհ Մինգ Պի):

Թանգարանի գեղարվեստական ֆոնդի հիմքը եղել են թագավորական հավաքածուները, որոնք հետագայում համալրվել են մենաստանների, եկեղեցիների և ազգայնացված որոշ տոհմական հավաքածուներով, նաև Նապոլեոնի արշավանքների ավարով, բազմաթիվ նվիրաբերումներով:

Լուվրն ունի արևելյան, եգիպտական, հունական և հռոմեական հնագույն իրերի, քանդակի, գեղանկարի, դեկորատիվ-կիրառական արվեստի և այլ բաժիններ:

Նշենք մի քանի հետաքրքիր փաստեր Լուվրի մասին.

1.Լուվրի թանգարանը ամենաշատ այցելու ունեցող թանգարանն է աշխարհում: Թանգարանը ռեկորդ է սահմանել, ունենալով 10 միլիոն այցելու 2012 թվականին:

2.Թանգարանում շրջելու և ամբողջը տեսնելու համար մեկ օրը բավարար չէ, պետք է առնվազն մեկ շաբաթ հասցնելու համար տեսնել ամեն ինչ, սակայն այդ դեպքում պետք է արվեստի գործերը դիտել առանց կանգ առնելու:

3. Լուվրը բաց է եղել այցելուների առջև1793 թվականի Ֆրանսիայում հեղափոխությունից հետո:

4. Լուվրը Ֆրանսերենից թարգմանաբար նշանակում է «Գայլերի անտառ»:

5. Թանգարանը բաղկացած է 4 շինությունից: Շինությունները ավելի պարզ տարբերելու համար, նրանց անվանում են «թևեր», իսկ ամեն մի «թև» ստացել է նշանավոր ֆրանսիացի գործիչների անվանում:

6.Թանգարանում գործում է 6 օրենք, որոնց պետք է հետևել թանգարան այցելելու ժամանակ օրինակ՝ չի թույլատրվում ուտել, լուսանկարել լուսարձակով, դիպչել ցուցանմուշներին և այլն: