Արտաշատի գիշերային ակումբում ծեծկռտուք է տեղի ունեցել. հարուցվել է քրգործ

Դեկտեմբերի 28-ի գիշերը, վիճաբանություն և ծեծկռտուք էր եղել Արտաշատի Օգոստոսի 23-ի փողոցում գործող գիշերային ակումբում, հնչել էին նաև կրակոցներ։ Ոստիկանության աշխատակիցները պարզել են միջադեպի հանգամանքները։

Ոստիկանության լրատվական ծառայությունից տեղեկացնում են, որ ժամը 03.15-ին «Արտաշատ» բժշկական կենտրոնի շտապօգնության կայանից ոստիկանության Արտաշատի բաժին դանակահարության վերաբերյալ հաղորդում էր ստացվել։

Քիչ անց, բաժնում ստացվել է երկրորդ ահազանգը։ Ոստիկանության Երևան քաղաքի վարչության օպերատիվ կառավարման կենտրոնից հայտնում էին, որ Արտաշատում կրակոց է եղել, և մի քաղաքացու հրազենային վիրավորումով տեղափոխել են «Վեդի» բժշկական կենտրոն:

Երրորդ ահազանգը կրկին «Արտաշատ» բժշկական կենտրոնից է եղել։ Հայտնում էին, որ «ձախ սրունքի ոսկրերի կոտրվածք» ախտորոշմամբ իրենց մոտ է ընդունվել 23-ամյա մի քաղաքացի, որն այնուհետև տեղափոխվել է «Աստղիկ» բժշկական կենտրոն:

Ոստիկանության Արարատի մարզային վարչության և Արտաշատի բաժնի ծառայողների ձեռնարկած օպերատիվ-հետախուզական համատեղ միջոցառումների արդյունքում պարզվել է, որ նույն օրը, ժամը 03.00-ի սահմաններում, Արտաշատի Օգոստոսի 23-ի փողոցում գործող գիշերային ակումբում Դարակերտ գյուղի բնակիչներ՝ 23-ամյա Ռաֆայել Ս․-ի, 21-ամյա Հայկ Ս․-ի, 23-ամյա Վլադիմիր Ու․-ի, 22-ամյա Արմեն Կ․-ի և ակումբի աշխատակիցների միջև վիճաբանություն ու ծեծկռտուք է եղել։

Շուրջ 20 րոպե կոպիտ կերպով խախտվել է հասարակական կարգը, բացահայտ անհարգալից վերաբերմունք դրսևորվել այցելուների նկատմամբ, խոչընդոտվել է գիշերային ակումբի բնականոն գործունեությունը։ Այնուհետև ակումբի տնօրեն 32-ամյա Դավիթ Պ․-ն աշխատասենյակից բերել է անհայտ տեսակի հրազեն և 2 անգամ կրակել։ Մի գնդակը դիպել է Ռաֆայել Ս․-ի ոտքին:

Դեպքի վայրի զննությամբ հայտնաբերվել է 12 մմ տրամաչափի 1 պարկուճ։ Դավիթ Պ․-ի աշխատասենյակից հայտնաբերվել է «ՎԵՊՐ-ՄՈԼՏ» տեսակի ողորկափող որսորդական հրացան` լիցքավորված 5 փամփուշտով։

Հրացանն ուղարկվել է փորձաքննության:

Ձեռնարկվում են միջոցառումներ դեպքի բոլոր հանգամանքները պարզելու և Դավիթ Պ․-ին հայտնաբերելու ուղղությամբ: Հարուցվել է քրեական գործ։ Կատարվում է նախաքննություն։