Արտոնյալ վաճառականներ կա՞ն. քաշքշուկ ու վիճաբանություն՝ քաղաքապետարանում

Փողոցային առևտրով զբաղվող քաղաքացիներն այսօր ևս բողոքի ակցիա են իրականացնում քաղաքապետարանի շենքի դիմաց՝ պահանջելով քաղաքապետարանի կողմից խոստացված տաղավարները: Նրանք պնդում են, որ 25 օր է, ինչ ոչինչ չեն վաճառել և սոցիալապես ծանր վիճակում են գտնվում:

Վրդովված վաճառականներից մեկը՝ Արմինե Թարփոշյանը, քիչ առաջ փոխանցեց, որ Երևանի քաղաքապետարանի առևտրի վարչության պետի տեղակալ Արմեն Թովմասյանն իրեն հրմշտել է և բղավել վրան:

«Ես Թովմասյանին կոնկրետ հարց եմ տվել, թե ինչու են թույլ տալիս, որ մի շարք այլ առևտրականներ ազատ վաճառք իրականացնեն, իսկ մեզ՝ ոչ, Թովմասյանը ինձ հրելով, քաշքշելով բղավում էր վրաս ու ասում, որ լավ է անում՝ ինչ անում է, քանի որ այդ վաճառականներն իրենց համար արտոնյալ են. ում կուզեն, նրանց էլ կթողնեն»,- ԼՈՒՐԵՐ.com-ի հետ զրույցում մանրամասնեց տիկին Արմինեն և հավելեց, որ Երևանի քաղաքապետարանի առևտրի վարչության պետի ժամանակավոր պաշտոնակատար Հովիկ Սաֆարյանը ևս այդտեղ էր և ոչ մի քայլ չէր ձեռնարկում:  

ԼՈՒՐԵՐ.com-ը կատարվածի իսկությունը պարզելու համար զրուցեց նաև Երևանի քաղաքապետարանի առևտրի վարչության պետի տեղակալ Արմեն Թովմասյանի հետ, որը հերքեց վաճառականի խոսքերը՝ մանրամասնելով, որ ընդամենը բռնել է տիկին Արմինեի թևից աստիճաններից ընկնելը կանխելու համար:

«Երբ ես դուրս եկա քաղաքապետարանի շենքից ու տեսա, որ կանայք բղավում են, մեղադրանքեր հնչեցնում, մասնավորապես, նաև տիկին Արմինեն, մոտեցա նրան և թևանցուկ արեցի, խնդրեցի նախ ցածր խոսել, այնուհետև զգուշանալ աստիճաններից: Այսքանն է եղել, իսկ ինչ վերաբերում է քաղաքի տարբեր անկյուններում դեռևս շարունակվող փողոցային  առևտրին, պետք նշեմ, որ մենք ամենօրյա աշխատանքներ ենք կատարում վերահսկելու և կանխելու ապօրինի առքուվաճառքը»,- նշեց Արմեն Թովմասյանը: 

Մեր այն ճշտող հարցին, թե բավարար տաղավարներ ե՞րբ կտրամադրվեն անգործ առևտրականներին, Երևանի քաղաքապետարանի առևտրի վարչության պետի տեղակալը նշեց, որ հստակ ժամկետ չգիտեն և բարերարների, գործարարների են սպասում, որպեսզի սահմանված տարածքներում տաղավարներ տրամադրելու համար ֆինանսական ներդրում կատարեն:

Արմինե ՄԻՔԱՅԵԼՅԱՆ