Հրապարակները պետք է ծառայեն որպես հրապարակներ. Շահումյան հրապարակում մեքենաներ չեն կայանի. քաղաքապետ

«Էլիտ Պլազա» բիզնես կենտրոնին Շահումյան հրապարկում մեքենաների կայանման թույլտվություն չի տրամադրվի։ Այսպիսի որոշում կայացրեց Երեւանի ավագանին այսօր՝ հունվարի 29-ին, հրավիրված նիստում։ ««Էլիտ-Պլազա» փակ բաժնետիրական ընկերությանը ծառայողական ավտոկայանատեղիի շահագործումը շարունակելու իրավունք տալու մասին» որոշման նախագծին դեմ քվեարկեց ավագանու 42 անդամ, 4-ը կողմ քվեարկեցին, 5-ը՝ ձեռնպահ։

Ավագանու նիստին ելույթ ունեցավ «Էլիտ-Պլազա» ընկերության տնօրեն Դավիթ Մկոյանը, որը կոչ արեց աջակցել բիզնեսին։

Սակայն ավագանու անդամները հիմնականում դեմ արտահայտվեցին կայանման թույլտվությանը։

Ավագանու «Իմ քայլը» խմբակցության անդամ Մեսրոպ Պապիկյանը նշեց, որ ժամանակն է Երեւանի հրապարակները վերադարձնել բնակչին ու հետիոտնին, ինչպես նաեւ՝ ոստիկանության միջոցով վերահսկել, որ հրապարակները չդառնան կայանատեղիներ։ Հուսով եմ, որ մեր քվեարկության արդյունքում Շահումյան հրապարակը եւ մյուս հրապարակները կազատագրվեն մեքենաներից։

Ավագանու «Իմ քայլը» խմբակցության անդամ Լեւոն Զաքարյանն էլ անդրադարձավ բիզնեսին աջակցելու կոչին՝ ասելով. «Բոլորս լավ հիշում ենք Մաշտոցի պուրակը, որտեղ պետք է լինեին բուտիկներ եւ բիզնեսը պետք է զարգանար, այսօր չեք գտնի մի քաղաքացի, որ գոհ չլինի, որ Մաշտոցի պուրակը մնացել է պուրակ»։

Նշենք, որ «Էլիտ Պլազա» բիզնես կենտրոնը ունի ստորգետնյա կայանատեղի, բայց Երեւանի նախորդ ավագնին կենտրոնի համար բացառություն էր արել եւ կայանման թույլտվություն տրամադրել։

Նման թույլատվության համար էր դիմել նաև «Ամերիաբանկ» ՓԲ ընկերությունը, որը ևս Երևանի ավագանին մերժեց։