«Չգիտեմ, թե էլ ինչ է պետք, որպեսզի Անանյանի դեմ գործ հարուցվի». փաստաբան

«Ինչպե՞ս կարող է վարչապետ Նիկոլ Փաշինյանը զբաղեցնել այդ պաշտոնն ու տեղյակ չլինել, թե իր  ենթակայության տակ գտնվող կառույցներին ինչպիսի գործողություններ են իրականացնում, այս դեպքում ինչպե՞ս կարող է նա զբաղեցնել այդ պաշտոնը»,- այս մասին այսօր հայտարարեց ՀՀ ՊԵԿ  օպերատիվ հետախուզության վարչության պետ Կարեն Կարապետյանի փաստաբան Տիգրան Հայրապետյանը և հավելեց, որ պետք է ստուգվեն բոլոր փաստերը և նոր միայն ՊԵԿ նախագահը նշանակվի տվյալ պաշտոնում:

Փաստաբանը վստահեցնում է՝ եթե դատարանի որոշումը չբավարարի իրենց՝ անպայման  բողոքարկելու են այն, ինչպես նաև քրեական գործ պետք է հարուցվի ՊԵԿ նախագահ Դավիթ Անանյանի դեմ՝ այն բանի համար, որ Կարեն Կարապետյանի չաշխատելու դեպքում բյուջեից 4 միլիոնից ավել գումար է դուրս գրել իբրև աշխատավարձ. «Չգիտեմ, թե էլ ինչ է պետք, որպեսզի Անանյանի դեմ գործ հարուցվի, նա մսխել է բյուջեն: Օրենքը պարտավոր են պահել ու կապ չունի, թե ով ինչ պաշտոն է զբաղեցնում»:

ԼՈՒՐԵՐ.com-ի այն դիտարկմանը, թե ինչպե՞ս կմեկնաբանի այն, որ Կարեն Կարապետյանի անունը բազմիցս կապվել է կոռուպցիոն սխեմաների, կոռուպցիոն բուրգերի հետ, ինչի մասին և նշանակման օրերին անընդհատ թմբկահարում էր մամուլը, փաստաբան Տիգրան Հայրապետյանը պատասխանեց. «Լավ հարց եք տալիս, բայց ՊԵԿ նախագահը կադրեր նշանակելիս հաստատ հաշվի է առել մարդու կենսագրությունը, և եթե Կարեն Կարապետյանի անունը ուղղակի կամ անուղղակի կերպով կապվել է որևէ կոռուպցիոն դեպքի հետ, նա այդ պաշտոնը չէր ստանա: Նա իր մեկամսյա աշխատանքներում ապացուցել է, որ օբյեկտիվ է իր գործում»:

Կարապետյանի փաստաբանը նաև տարակուսանք հայտնեց աղմկահարույց պարգեւատրումների բաշխման մեխանիզմի վերաբերյալ՝ նշելով, որ առնվազն արդար չէ, որ իր պաշտպանյալը, որը  օպերատիվ հետախուզության վարչության պետն է, մի քանի անգամ պակաս է ստացել վարորդից ու քարտուղարուհուց.

«Դեկտեմբերին ինքը ստացել է 400 հազար՝ պահումները հանած՝ 289 հազար դրամ, որը 4 անգամ պակաս է, քան վարորդի գումարը և մոտավոր 6 անգամ պակաս, քան քարտուղարուհունը»,-նշեց Հայրապետյանը:

 Մանրամասները՝ տեսանյութում:

Արմինե ՄԻՔԱՅԵԼՅԱՆ