30 հոգով հավաքվելը և հրաժարական պահանջելն անհիմն է․ Վարդենիսում՝ բողոքի ակցիայի իրական պատճառը

Ինչպես արդեն տեղեկացրել էինք, Վարդենիս-Երևան մայրուղին առավոտից փակ է: Մի խումբ վարդենիսցիներ բողոքի ակցիա են իրականացնում՝ պահանջելով մարզպետ Գնել Սանոսյանի հրաժարականը: Նրանք, մասնավորապես, նշում են, որ մարզպետը խտրական վերաբերմունք է ցույց տվել համայնքապետի թեկնածուներից Գևորգ Սիմոնյանի նկատմամբ։

Գեղարքունիքի մարզպետ Գնել Սանոսյանը ԼՈՒՐԵՐ.com-ի հետ  զրույցում նկատեց, որ հիվանդանոցում եղած միջադեպը, որ թույլ չեն տվել թեկնածուներից Գևորգ Սիմոնյանին քարոզարշավ իրականացնել, որն էլ համարվում է բողոքի ակցիայի պատճառ, իր հետ չի կարող որևէ կապ ունենալ․ «Խնդիրը նրանում է, որ երեք-չորս թեկնածու հանդիպում  է ունեցել հիվանդանոցի աշխատակիցների հետ, այս թեկնածուի պարագայում հանդիպում չի եղել, մի կողմը պատճառաբանել է օրենքը, հիվանդանոցում վթարի հետ կապված աշխատակիցներին հավաքելու խնդիրը, մյուս կողմի պատճառաբանությամբ՝ իբրև թե մարզպետի կողմից հանձնարարություն կա։ Նման բան չկա։ Այստեղ իմ անունը շահարկելն անտեղի է, ես արդեն 4 օր է երկրում չեմ եղել և միայն վերադառնալուց՝ օդանավակայանում եմ իմացել, որ ճանապարհ են փակել։ Որևէ մեկին, որևէ բան այդ առումով չեմ հանձնարարել, և իմ կարծիքով՝ մարզպետն ամեն օր հանձնարարելով չպետք է զբաղվի»,- նշեց Սանոսյանը և հավելեց, որ կան համապատասխան մարմիններ, որոնք կարող են պարզել՝ արդյոք հիվանդանոցի տնօրենը ստացել է հանձնարարական իրենից, թե՝ ոչ, ինչու է մյուս թեկնածուներին թողել, և արդյոք պետք է թեղներ՝ ըստ օրենքի, թե՝ ոչ։

Վերջինս 30 հոգով հավաքվելը և հրաժարական պահանջելն անհիմն է համարում, իսկ այս բողոքի ակցիայի տակ, ըստ իրեն, կա այլ ենթատեսքտ․ «Որոշ մարդիկ շահարկում են Վարդենիսի ներկայիս ԺՊ-ի իմ համակուրսեցին լինելու փաստը, բայց միայն դա։ Իրականում, և՛ ես, և՛ մեր քաղաքական թիմը Վարդենիսում ոչ ոքի չենք աջակցում։ ՔՊ-ն Վարդենիսում քաղաքապետի թեկնածու չունի։ Իրականում, օդում կապված լուրերի համաձայն այն թեկանծուն, որը բողոքում է, Վարդենիսի հոգեբուժարանի տնօրենն էր, որը չի վերանշանակվել այդ պաշտոնին։ Այդտեղ իմ գործոնը չկա, բայց այդ մարդիկ՝ այս խնդիրն ունենալով, փորձում են այլ կերպ շահարկել կամ կապել ինձ հետ»,- ամփոփելով նշեց մարզպետ։

Արմինե ԱՐՄԵՆԱԿՅԱՆ