Նարեկ Սամսոնյանի դեմ հաղորդում է ներկայացրել Սեյրան Օհանյանը

Օրեր առաջ քաղաքագետ Նարեկ Սամսոնյանը հրավիրվել էր ոստիկանության 6-րդ վարչություն։ Տեղեկությունը ԼՈւՐԵՐ.com-ի հետ զրույցում հաստատել էր Սամսոնյանը:

Այսօր արդեն ներկայանալով ոստիկանության 6-րդ վարչություն պարզել է, որ իրեն հրավիրել են Սեյրան Օհանյանի փաստաբանի դիմումի հիման վրա. «Ես լրահոսում հանդիպել էի, որ Սեյրան Օհանյանը ցուցմունք է տվել Սերժ Սարգսյանի վրա ինչ-որ երկաթգծի գործով և ֆեյսբուքի իմ էջում արտատպել էի՝ գրելով, որ տեղի է ունեցել այսպիսի բան ու նորմալ գեներալը այդպիսի բան չի անի և եթե մտածում է, որ լավ գեներալ է իր Գերագույն գլխավոր հրամանատարի վրա չի փորձի ցուցմունքներ գրել լավ իմանալով, որ իշխանությունները դրան են սպասում, ուրեմն լավ գեներալ չէ: Սեյրան Օհանյանի փաստաբանը դիմել է 6-րդ վարչություն՝ հայտարարելով ամենաաբսուրդը, որ ես տիրապետում եմ նախաքննական գաղտնիքի, և երկրորդը, որ ես հրապարակել եմ նախաքննական գաղտնիք: Հաջորդ աբսուրդը և զավեշտալին, որ ես գեներալ, գնդապետ Սեյրան Օհանյանին սպառնացել եմ գնդակահարությամբ: Ուղղակի գրառման վերջում գրել էի՝ «պարոն գեներալ, սովորաբար դավաճանող սպաներին գնդակահարում են»: Սրա մասին բոլորը գիտեն բոլորը: Իմ կարծիքով` Սեյրան Օհանյանը համարելով, որ ինքը դավաճանող սպա է, գնդակահարությունը համարել է իրեն ուղղված»,- պատմեց Սամսոնյանը: 

Նա հայտնեց նաև, որ 6-րդ վարչության աշխատակիցներին տեղեկացրել է, որ բնավ մտադրություն չունի Օհանյանին գնդակահարությամբ սպառնալու. «Հատկապես այս գործով Օհանյանն արդեն գնդակահարված է: Ասացի նաև, որ երբ Սեյրան Օհանյանը պաշտպանում էր սպա գնդակահարած տեռորիստներին և գոռում էր, որ ՊՊԾ գնդի վրա գրոհած տեռորիստները, իր գործընկերներին սպանածները քաղբանտարկյալներ են դա հազար անգամ ավելի ամոթ ու ավելի մեծ սպառնալիք է պարունակում, քան ցանկացած դավաճանող սպայի գնդակահարումը»,- ասում է քաղաքագետը: 

Ավելի վաղ` Սամսոնյանը հայտնել էր, որ իրեն հրավիրել են ինչ-որ դիմումի հիման վրա սոցցանցերում արված գրառումների հետ կապված. «Ախր անգամ զանգի ձևն ու օրն են էս մարդիկ «խիստ պատահական» համապատասխանեցրել էն օրվան, երբ ես հիվանդանոցում սպասում եմ երեխայիս ծնվելուն: Ու էսքանը քիչ ա մի հատ էլ փոխանակ զանգեն ինձ, զանգում են մորս ձեռքին ու շտապում են հայտնել, որ «6-րդ վարչությունից ինձ են հարցնում» ու համարս էլ չգիտեմ ինչպես չեն գտել (իմ համարն ամենահեշտ հասանելիներից է), որ ինձ զանգեն»,- գրել էր նա:

Հ.Գ. Նկատենք, որ սա նոր տենդենց է նորհայաստանյան իրականության մեջ և արդեն երրորդ դեպքն է, երբ ֆեյսբուքում արտահայտած մտքերի համար հրավիրվում են ոսիկանություն: