Ազատամարտիկ Միքայել Ավագյանը չի մասնակցել է վրաց-աբխազական պատերազմին. մերկացվել է հերթական ադրբեջանական սուտը

Ադրբեջանական մամուլում տարածված լուրերը, թե իբր  Արցախյան պատերազմում զոհված ազատամարտիկ  Միքայել Ավագյանը մասնակցել է վրաց-աբխազական պատերազմին, չեն համապատասխանում իրականությանը: «Արմենպրես»-ի  հետ զրույցում այս մասին ասաց ազատամարտիկի կինը` Մանուշակ Ավագյանը՝ նշելով, որ Միքայել Ավագյանը վրաց-աբխազական պատերազմի մասնակից չի եղել, քանի որ նա այդ ժամանակ գտնվում էր Հայաստանում:

Մանուշակ Ավագյանի խոսքով` նման տեղեկատվություն տարածողները  նպատակ ունեն ապամոնտաժել Միքայել Ավագյանի՝ Ախալքալաքի Բուգաշեն գյուղում տեղադրված կիսանդրին, ինչպես նաև սեպ խրել Հայաստանի և Վրաստանի հարաբերություններում:

«Իրենք մեկնաբանում են, թե, իբր  Միքայել Ավագյանը 1992-93 թվականների վրաց-աբխազական պատերազմի մասնակից է. դա սուտ է և իրականությանը չի համապատասխանում: Իրականությունն այն է, որ 1990 թվականի վերջին  մենք ընտանիքով տեղափոխվել ենք Ռուսաստան, իսկ 1991 թվականին ինքը արդեն բնակվել է Հայաստանում և գրանցվել է Սիսիային շրջանի Սառնակունք գյուղում: Դրա մասին է վկայում անձնագրում կատարված գրանցումը, իսկ 1992 թվականին Հայաստանում ծնվել է աղջիկս: Բացի այդ, ամուսինս այդ  թվականներին աշխատել է «Հայգազարդ» ընկերության Գորիսի մասնաճյուղում: Յուրաքանչյուրը կարող է հարցում անել և պարզել դրա իսկությունը: Իսկ արդեն 1993 թվականին նա ընտանիքով տեղափոխվել է Արցախ  և կամավոր մասնակցել Արցախյան ազատամարտին՝ որպես հետախուզական ջոկատի հրամանատար: 1994 թվականին ամուսինս զոհվել է մարտական գործողությունների ժամանակ»,- ասաց Մանուշակ Ավագյանը:

Մանուշակ Ավագյանը «Արմենպրես»-ին նաև ուղարկել է անձնագրերի լուսանկարները:

Փետրվարի 8-ին Վրաստանի խորհրդարանի շենքի դիմաց Վրաստանի ազգությամբ ադրբեջանցի մի խումբ քաղաքացիներ բողոքի ցույց էին անցկացրել` պահանջելով ապամոնտաժել հունվարի 20-ին Ախալքալաքի Բուղաշեն գյուղում վերաբացված՝ արցախյան ազատամարտիկ Միքայել Ավագյանի կիսանդրին: 
Վրաստանում գործող մի շարք հայկական հասարակական կազմակերպություններ քննադատել են  Թբիլիսիում ադրբեջանցիների անցկացրած բողոքի ակցիայի կազմակերպումը: