Տեմպը պետք է պահվի

ԱԺ-ում այսօր կառավարության ծրագրի քննարկման ժամանակ վարչապետ Փաշինյանին հարց ուղղեց «Լուսավոր Հայաստան»-ի պատգամավոր Մանե Թանդիլյանը։ 

«Այն, որ ծրագիրը, մեղմ ասած, հագեցած չէ թվերով և թիրախներով, գատնիք չէ, այնուամենայնիվ, տնտեսությունը արտացոլվում է թվերի միջոցով, և այս առումով հետաքրքրական է, հաշվի առնելով, որ արտահանումը դիտվում է որպես տնտեսության զարգացման շարժիչ ուժ, ուզում եմ պարզել, օրինակ՝ այս տարվա 7,8% -ը որպես արտահանման աճ զգալի աճ է համարվո՞ւմ այս ծրագրի տեսանկյունից, թե՞ ոչ, և ինչպե՞ս եք Դուք այն գնահատում, և երկրորդ հարցը՝ ենթադրենք՝ երկու-երեք տարի անց դուք նայում եք կառավարության աշխատանքը և ուզում եք գնահատել այն․ ծրագրի կոնկրետ ո՞ր գրվածն է, որ պետք է տեղի չունենա կամ այլ կերպ տեղի ունենա, որ դուք գնահատելիս հասկանաք, որ ծրագիրը, կարծեք թե, վտանգված է և չի կատարվում այն»,-ասաց պատգամավորը։

Հարցին ի պատասխան՝ Նիկոլ Փաշինյանը մի քանի չափանիշ նշեց՝ աղքատության ծավալները, գործազրկության ծավալները, հարկեր-ՀՆԱ ցուցանիշը, արտահանման ծավալներն ու տնտեսական աճը։

«Ձեր նշած արտահանման աճը, ինչքան էլ տարօրինակ թվա, արտահանման հեղափոխական աճ է: Ինչո՞ւ: Որովհետև այդ աճը տեղի է ունեցել հանքարդյունաբերության էական կրճատման պայմաններում, հանքարդյունաբերության ոլորտի արտահանման կրճատման կոնտեքստում մենք ունեցել ենք արտահանման՝ Ձեր ասած չափով աճ, առանձնակի նշանակություն ունեն, օրինակ՝ մանածագործական իրերի՝ 65,4% արտահանման աճը, կոշկեղեն, գլխարկներ, հովանոցներ՝ 58% աճը, բուսական ծագման արտադրանքի 47% աճը։

Եթե այս տեմպը մենք կարողանանք պահել՝ մենք իսկապես կարող ենք արձանագրել, որ թևակոխում  ենք տնտեսական հեղափոխության փուլ»,-հայտարարեց Փաշինյանն ու հավելեց, որ այդ տեմպը պահելու նախադրյալներ կան․ լուրջ ներդրումներ են իրականացվում տեքստիլի ոլորտում, կաշվի վերամշակման ոլորտում, առաջիկայում սպասվում են հազարավոր աշխատատեղերի բացում, նաև՝ ջերմաէլեկտրակայանի կառուցման գործընթացում։

Մանե Թանդիլյանը հակադարձեց՝ ծրագրում աղքատության տոկոսի նվազման թիրախ չկա դրված, Նիկոլ Փաշինյանն էլ զարմացավ պատագամավորի դիտարկումից՝ հիշեցնելով, որ իրենք ասել են, որ ծայրահեղ աղքատությունը պետք է հաղթահարվի։

«Եթե պարզվի, որ էդ ամեն ինչի արդյունքում ծայրահեղ աղքատությունը նվազել է և մնացել է 0,5 կամ 1 կամ երեք տոկոս, ես չեմ համարի, որ մենք էդտեղ ձախողել ենք,-ասաց Փաշինյանն ու հավելեց, որ իրենք խնդիր են դրել լուծել այն անգամ 100%-ով։