«Կենտրոնի Կյաժին» Սերժ Սարգսյանի եղբորորդին սպառնացել է ճիշտն ասելու դեպքում սպանել

Երևանի ընդհանուր իրավասության դատարանում սպանության փորձ կատարելու մեջ մեղադրվող Հայկ Ալեքսանդրի Սարգսյանի գործով դատական նիստում ցուցմունք է տվել տուժող«Կենտրոնի Կյաժ» մականունով հայտնի  Դավիթ Սիմոնյանը: Դատարանում Դավիթ Սիմոնյանը ներկայացրել է, թե ինչու է 11 տարի առաջ քննիչներին պատմել, թե իր ուղղությամբ կրակել է ոչ թե Հայկ Սարգսյանը, այլ Արթուր Ղևոնդյանը: Ըստ տուժողի` նախկինում քննիչներին ցուցմունք է տվել, թե իր ուղղությամբ կրակել է Արթուր Ղևոնդյանը, որովհետև Հայկ Սարգսյանը իրեն սպառնացել է:

«Հայկն ինձ ասաց՝ էլ չես ապրի, եթե չներկայացնես, որ Արթուր Ղևոնդյանն է կրակել, ես էլ նույնը պատմեցի քննչական մարմնին:»,- ասել է Դավիթ Սիմոնյանը:

Դատախազ Աբգար Առաքելյանը հետաքրքրվել է՝ արդյոք նա ճանաչում է Արթուր Ղևոնդյանին, Սիմոնյանը պատասխանել է, որ Ղևոնդյանին ճանաչում է, քանի որ ապրում են նույն բակում: Տուժողը հավելել է նաև, որ որևէ համաձայնության չէր եկել Արթուր Ղևոնդյանի հետ, որ նրա դեմ ցուցմունք է տալու:

Սիմոնյանը պատմել է, որ դեպքից մի որոշ ժամանակ անց աշխատանքի է անցել «Գանձաղբյուր» ՍՊԸ-ում, որը պատկանում է Հայկ Սարգսյանին, սակայն դա կապված չէր իր ցուցմունքի բովանդակության հետ:

Դատախազը հետաքրքրվել է, թե ինչն է պատճառը, որ դեպքից 11 տարի անց որոշել է պատմել իրականությունը, Սիմոնյանն ասել է, Հայկ Սարգսյանը վատ վերաբերմունք է ցուցաբերել իր նկատմամբ և իր որոշման վրա ազդել է այն, որ երկրում իրավիճակ է փոխվել:

Հայկ Ալեքսանդրի Սարգսյանին մեղադրանք է առաջադրվել այն բանի համար, որ նա 2007 թվականի ապրիլի 1-ին` ժամը 16:00-ի սահմաններում, իր բնակության վայրի` Երևան քաղաքի Թումանյան փողոցի 11 շենքի 14 բնակարանի նկուղային հարկում գտնվող սենյակում, քննությամբ չպարզված հանգամանքներում ապօրինի ձեռք բերած և պահվող, հրազեն հանդիսացող «SIGSAUER» տեսակի «P266» մոդելի ատրճանակով Դավիթ Աշոտի Սիմոնյանին ապօրինաբար կյանքից զրկելու դիտավորությամբ կրակել է վերջինիս որովայնին, սակայն հանցագործությունն ավարտին չի հասցրել իր կամքից անկախ հանգամանքներում: Հայկ Սարգսյանը մեղադրվում է ՀՀ քրեական օրենսգրքի 235 հոդվածի 1-ին մասով (ապօրինի կերպով զենք, ռազմամթերք, պայթուցիկ նյութեր կամ պայթուցիկ սարքեր ձեռք բերելը, իրացնելը, պահելը, փոխադրելը կամ կրելը) և 34-140 հոդվածի 1-ին մասով (սպանության փորձ):