«Միգուցե պատրաստ չեմ նորությունների»․ լարված իրավիճակ՝ պոլիկլինիկայում

ԼՈւՐԵՐ․com-ի հետ զրույցում Թիվ 12 պոլիկլինիկայի տնօրեն Արմեն Վարդումյանը փոխանցեց, որ այս պահին պոլիկլինիկայում հանգիստ է, աշխատանքները նորմալ հունով ընթանում են․ «Մի քանի ժամ լարված մթնոլորտ էր, քանի որ աշխատակիցները անակնկալի էին եկել իմ որոշումից։ Իսկապես ես եմ որոշում կայացրել, ոչ ոք չի ազդել իմ որոշման վրա և ինձ ոչ ոք չի կարող ստիպել ազատման դիմում գրել։ Նման խոսակցություն չի եղել, մարդիկ մտածել են՝ ինչպես եղավ, որ մեկ օրվա մեջ նման որոշման հանգեցի, ուրեմն ինչ-որ բան է եղել, ինչից ընդվզում է առաջացել։ 22 տարի աշխատել ենք միասին, այսօր հավաքել էի շնորհակալությունս հայտնելու, որից հուզիչ վիճակ մթնոլորտ առաջացավ»,- ասաց Վարդումյանը։ 

Հարցին՝ ափսոսանքո՞վ է հրաժարվում աշխատանքից, տնօրենը պատասխանեց․ «Չէի ասի, ես արդեն 3 ամիս է մտածում էի տնօրենի պաշտոնից ազատվելու մասին։ Անձնական խնդիրներ ունեմ, 22 տարի տնօրենի պաշտոնին եմ,  ճիշտն ասած մի քիչ էլ հոգնել եմ, ավելի հանգիստ աշխատանքի կուզեի գնալ։ Ես ներվապաթոլոգ եմ, հիվանդանոցում երկար տարիներ աշխատել եմ, մեկ ամիս հանգստանամ կորոշեմ ինչ անել, չի բացառվում նաև, որ Մոսկվա գնամ»,- նշեց նա։ 

Հնարավո՞ր է Ձեր որոշումը կապված է երկրում տեղի ունեցած փոփոխությունների հետ՝ հարցին ի պատասխան պոլիկլինիկայի տնօրենն ասաց․ «Ոչ, ընդհակառակը բյուջեն ավելացել է, մարդկանց աշխատավարձը բարձրացել է։ Նորություններ են նախատեսվում, որոնց միգուցե պատրաստ չեմ, դրանց համար էնտուզիազմ, եռանդ է պետք»,- ասաց պոլիկլինիկայի տնօրենը։ 

Սոնա Հարությունյան