Կալանավորները համատարած հացադուլ կսկսեն. Նաիրա Զոհրաբյան

Կառավարությունն այսօրվա նիստի ժամանակ բացասական եզրակացություն տվեց Ազգային ժողովի «Բարգավաճ Հայաստան» խմբակցության պատգամավոր  Նաիրա Զոհրաբյանի օրենսդրական նախաձեռնությանը, որով առաջարկվում էր ՀՀ-ի քրեական օրենսգրքի 69-րդ հոդվածում կատարել փոփոխություն, ըստ որի՝ մինչև դատավճռի օրինական ուժի մեջ մտնելը կալանքի տակ պահելու ժամկետը պետք է հաշվակցվի ազատազրկման, կարգապահական գումարտակում պահելու ձևով նշանակված պատժին՝ 1 օրը հաշվելով 1,5 օրվա դիմաց:

ԲՀԿ-ական Նաիրա Զոհրաբյանը ԼՈՒՐԵՐ.com-ի հետ զրույցում նշեց, որ իր համար անակնկալ չէր սեփական նախաձեռնության մերժումը կառավարության կողմից, քանի որ 1 օր առաջ նմանատիպ նախագիծ էր ներկայացրել նաև Էդմոն Մարուքյանը, որը նույնպես մերժվել էր: Ըստ Զոհրաբյանի, որևէ փաստարկված հիմնավորում չկա, թե ինչու է մերժվել նախագիծը:

«Ինձ համար ընդունելի չեն կառավարության հիմնավորումները: Ես լինելով նաև նախկին լրագրող, լավատեղյակ եմ կալանավայրերում տիրող աղետալի վիճակից, լավատեղյակ եմ, թե ինչպես են 20-25 հոգի մնում տառականներով լի մեկ խցում և հերթով քնում, այդ իսկ պատճառով նման մարդասիրական օրինագիծ եմ ներկայացրել: Նշեմ, որ 1 օրը 1.5 օրով փոխարինելը ընդունված է միջազգային պրակտիկայում: Նման նախադեպ գործել է Հայաստանում, բայց թե ինչու մերժեցին, այդ հարցերը պետք է ուղղեք կառավարությանը»,- ասաց Նաիրա Զոհրաբյանը: 

Մեր զրուցակիցը մանրամասնեց, որ այս օրերին բոլոր քրեակատարողական հիմնարկներից իրեն են զանգահարում և ասում, որ իրենք պատրաստվում են համատարած հացադուլ անել. «Ինձ մի կերպ հաջողվել է կանխել դա՝ համոզելով, որ նախագիծը բերելու է նաև ԱԺ, և ի տարբերություն կառավարության այս որոշման, հնարավոր է, որ պետաիրավական համակարգը հավանություն տա դրան: Ես հորդորել եմ նրանց, որ անկախ կառավարության և անգամ պետաիրավական հանձնաժողովի որոշմանը, ետ կանգնեն հացադուլ անելու քայլից»:

Մեր այն դիտարկմանը, որ այս կառավարությունն այն նույն կառավարությունն է, որն ամիսներ առաջ արեց նախադեպը չունեցող համաներում, ո՞րն է տրամաբանությունն այս նախագծին դեմ գնալու, Զոհրաբյանը նշեց. «Իրենց հիմնավորումների մեջ ասվում է, որ դատաիրավական համակարգն այս պահին բավականին ծանրաբեռնված է և չեն հասցնի այդ ծավալով գործերը վերանայվել, ասում են, որ միգուցե գնան անհատական մոտեցումների»:

Մեր զրուցակիցը նշեց, որ եկող շաբաթ Արդարադատության նախարարին հրավիրելու են Մարդու իրավունքների հանրային հարցերի հանձնաժողով՝ մի շարք խնդիրներ քննարկելու, այս հարցին ևս կանդրադառնան:

Արմինե ՄԻՔԱՅԵԼՅԱՆ