ԱԺ-ն օրակարգում չընդգրկեց «Արհեստակցական միությունների մասին» օրենքում լրացումներ կատարելու մասին նախագիծը

ՀՀ ազգային ժողովը չընդունեց Արհեստակցական միությունների մասին օրենքում լրացումներ կատարելու մասին օրենքի նախագիծը լիագումար նիստի օրակարգ ընդգրկելու մասին որոշումը: «Բարգավաճ Հայաստան» խմբակցության մի քանի պատգամավորների կողմից ներկայացված նախագծին կողմ քվեարկեց 36, դեմ` 53,  ձեռնպահ` 3 պատգամավոր:

«Նախագծի նպատակն այն է, որ Հայաստանում վերջապես ունենանք անկախ արհեստակցական միություններ: Դա հետաքրքրում է Հայաստանի հարյուր հազարավոր աշխատողների»,-ասաց նախագծի համահեղինակ,  «Բարգավաճ Հայաստան» խմբակցության պատգամավոր Գևորգ Պետրոսյանն ու նշեց`  ԱԺ-ն արդեն որերորդ անգամ չի ցանկանում ունենալ անկախ արհեստակցական միություն:

 Նա անդրադարձավ դիտարկմանը, թե նախագծի նպատակը աշխատողներին վերահսկողության տակ պահելն Է` ժխտելով այդ տեսակետը:

«Բարգավաճ Հայաստան» խմբակցության պատգամավոր Շաքե Իսայանը ներկայացրեց գլխադասային հանձնաժողովի ` մարդու իրավունքների պաշտպանության և հանրային հարցերի հանձնաժողովի տեսակետը:

«Գուցե արհմիությունների ոլորտում գլոբալ փոփոխությունների կարիք կա: Բայց քանի դեռ ամբողջությամբ ներկայացված չեն դրանք, խնդիրները չեն կարող լուծվել: Այս նախագիծը ներկայացված է եղել նաև նախորդ գումարման Աժ-ում, որտեղ նույն հիմնավորմամբ կառավարությունը մերժել էր, հետո հանձնաժողովը դրական եզրակացություն էր տվել: Հիմա, չնայած ԲՀԿ-ի և ԼՀԿ-ի ներկայացուցիչների կողմ քվեարկությանը, հանձնաժողովը բացասական եզրակացություն է տվել»,-նշեց նա:

Քվեարկությամբ նախագիծը չմտավ լիագումար նիստի օրակարգ: