Թե նախկին, թե ներկա իշխանությունները նույն ուղին են ընտրել

ՀՀ վարչապետ Նիկոլ Փաշինյանն աշխատանքային այցով Բրյուսելում էր։ Սա խորհրդանշական էր այն առումով, որ վարչապետը թեև 2018թ.-ի ամռանը ՆԱՏՕ-ի վեհաժողովի առիթով մեկնել էր Բրյուսել, բայց սա նրա՝ վարչապետ դառնալուց հետո առաջին աշխատանքային այցն էր այնտեղ։ 

Թեև մայիսին տեղի է ունենալու Եվրոպական խորհրդարանի ընտրությունը և ձևավորվելու է նոր ղեկավարություն, նոր խորհրդարան, կլինի ԵԽ նոր նախագահ, սակայն «Եվրոպական ինտեգրացիա» հասարակական կազմակերպության քաղաքական հարցերով փորձագետ Մանվել Ղումաշյանի կարծիքով, սա առիթ չէ մտածելու, որ վարչապետի այցը սխալ ժամանակահատվածում է կատարվել․

«Եթե մենք սպասենք այս կամ այն ուղղությամբ լավ ժամանակներ լինելուն, որ այցեր կատարվեն, դա պարզապես կլինի անհեռատես քաղաքականություն։  Ամեն մի երկրում, տարածաշրջանում խմորումներ են։ Երկու ամիս անց փոփոխություններ կլինեն Եվրոպայի խորհրդարանում, բայց դա չի նշանակում, որ նոր քաղաքականություն կլինի ԵՄ-ի կողմից։ Այս առումով՝ ես ոչ մի խնդիր չեմ տեսնում»,- ԼՈՒՐԵՐ․com-ի թղթակցի հետ զրույցում ասաց Ղումաշյանը։

Վերջինս վարչապետի թե՛ այցը Բրյուսել, և թե՛ հանդիպումներն ու կնքված պայմանագրերը բավականին կարևոր է համարում․ «Պայմանավորվածություններ են եղել կրթության և IT ոլորտում: Վերջինն այսօր ամենաթույլ և զարգացման ենթակա օղակն է մեր երկրում, քանի որ առանց դրա, տնտեսության այլ ուղղությունների զարգացումը թերի է լինելու»,-ասաց Մանվել Ղումաշյանը։ 

Այս այցից, սակայն, Ղումաշյանն առանձնահատուկ ակնկալիքներ չունի և չի տեսնում նաև Հայաստանի կողմից վեկտորի էական փոփոխություն․ «Թեպետ ՀԱՊԿ-ի հետ կապված դժվարություններ կան, բայց մենք այնտեղ տեսնում ենք ռազմական ոլորտում լուրջ հարաբերություններ։ Հնարավոր է՝ ԵՄ օժանդակությունը շատ ավելի մեծ ծավալի դառնա, քանի որ ԵՄ-ն արձանագրել է, որ վերջին ընտրություններից հետո դրական տեղաշարժեր են, այն կարգի, որ լուրջ տնտեսական հարաբերությունների մասին կարող ենք խոսել»,-ասաց նա։

Փորձագետի կարծիքով՝ թե՛ նախկին, և թե՛ ներկա իշխանությունները արտաքին քաղաքականություն վարելիս նույն ուղին են ընտրել, և այդ առումով չկա որևէ տարբերություն․ «Ինչքան էլ հեղափոխություն կամ իշխանափոխություն լինի, մենք տեսնում ենք, որ նախկին և նոր իշխանությունները ցանկանում են արտաքին քաղաքականության բոլոր ուղղություններով նորմալ հարաբերություններ հաստատել։ Ես նոր իշխանությունների կողմից վեկտորային փոփոխություն չեմ տեսնում»,- ամփոփելով՝ ասաց Ղումաշյանը։

Արմինե ԱՐՄԵՆԱԿՅԱՆ