Յունիբանկի պաշտոնյան տիրացել է վարկառուի երկհարկանի տանը

Քաղաքացիներ Գեղամ և Մարիետա Առաքելյանները կորցրել են իրենց տունը և արդեն 6 տարի է՝ գտնվում են դատական քաշքշուկի մեջ: Յունիբանկից վերցրած վարկի արդյունքում նրանց երկհարկանի տան սեփականատեր է դարձել նույն բանկի վարչության նախագահի տեղակալը, իսկ իրենք բնակվում են վարձով՝ իրենց տան հարևանությամբ: Այս մասին ԼՈւՐԵՐ․com—ի հետ զրույցում հայտնեց Մարիետա Առաքելյանը։

Այս հարցով «Տուժած վարկառուների իրավական պաշտպանության կենտրոն» հասարակական կազմակերպությունը ևս դիմել է ՀՀ վարչապետ Նիկոլ Փաշինյանին և ԱԱԾ տնօրեն Արթուր Վանեցյանին՝ վերջիններիս ուշադրությունը հրավիրելով իրենց կարծիքով՝ կոռուպցիոն մի սխեմայի վրա, որի արդյունքում, ըստ երևույթին, տուժել են հազարավոր քաղաքացիներ․ «Ընտանիքը վտարված է, արդարադատությունը՝ ոտնահարված։ Ունենք հիմնավոր կասկածներ, որ հարյուրավոր քաղաքացիներ տուժել են այս սխեմայի արդյունքում և ճարահատված արտագաղթել»,- ասվում է հայտարարության մեջ։

Մարիետա Առաքելյանի խոսքով՝ կոռուպցիան առնչվում է Վճռաբեկ դատարանում բաժնի պետ Արմեն Առաքելյանին և նրա կնոջը՝ Յունիբանկի իրավաբանական վարչության պետ Օվսաննա Առաքելյանին․ «Դիմել ենք բոլոր ատյաններին, այժմ գործը Վճռաբեկում է, վերջին աստիճանին ենք հասել։ Վարչապետին, ԱԱԾ-ին խնդրում ենք քննության առարկա դարձնել Վճռաբեկ դատարանի բաժնի պետ՝ Արմեն Առաքելյանի անօրինական գործունեություններին, որոնք ուղղված են եղել ուղղորդել դատավորներին և միջամտել դատական ակտերին որի արդյունքում տասնյակ տարիներ Յունիբանկը մշտապես հայտնվել է հաղթողի կարգավիճակում։ 2012 թ․ գումարն անընդհատ ավելանում էր, որի արդյունքում մեզ՝ վարկառուներիս գցեցին ֆինանսական կոլապսի մեջ և մեր ընտանիքին վտարելով՝ տիրացան մեր միակ կացարանին»,-ասաց Առաքելյանը։ 

Ըստ Մարիետա Առաքելյանի՝ «Յունիբանկ» ՓԲԸ-ի և իր ամուսնու՝ Գեղամ Առաքելյանի միջև կնքված անշարժ գույքի հաջորդող հիփոթեքի պայմանագրով խախտվել է իր սեփականության իրավունքը, քանի որ լինելով Գ. Առաքելյանի կինը, համատեղ ամուսնության ընթացքում ձեռք բերված տան նկատմամբ ունեցել է համատեղ սեփականության իրավունք․ «Բանկը գույքը ձեռք բերելուց հետո գործարքներ կնքելիս պետք է մասնակից դարձներ նաև ինձ, ինչը չի արել: Դրանով խախտել է մեր իրավունքները, չի ծանուցել գրավի առարկայի բռնագանձման մասին, չի ուղարկել բռնագանձման ծանուցագրեր՝ դրանով իսկ զրկելով մեզ՝ համասեփականատերերիս մեր գույքի բռնագանձման օրինականությունը վիճարկելու հնարավորությունից»,- պատմեց նա:

Նշենք, որ ֆեյսբուքում տարածված հայտարարության մեկնաբանություններից դատելով՝ Գեղամ և Մարիետա Առաքելյաններ զույգը միակը չէ, որ տուժել է Յունիբանկից։ Ֆեյսբուքյան մի շարք օգտատերեր հայտարարում էին, որ Յունիբանկը իրենց համար «պատուհաս է դարձել»։

Սոնա Հարությունյան