Գագիկ Հարությունյանն իր դեմ խոսող դատավորների «որս» է սկսել

Դատավոր Կարինե Պետրոսյանի նկատմամբ կարգապահական վարույթ է հարուցվել, քանի որ վերջինիս կողմից Սնանկության դատարան չի հանձնվել 150 սնանկության գործ: Դատավորը սա համարում է ճնշման անհաջող փորձ:

«Այս պահին Ալեքսեյ Սուքոյանի հետ հակամարտություն ունենք Բարձրագույն Դատական Խորհրդի հետ: Եվ մեր վերջին հայցը, որը լրացվել է, բավականին վտանգավոր հայց է ԲԴԽ-ի համար: Այն վերաբերում է հանգամանքին, որ ԲԴԽ նախագահ Գագիկ Հարությունյանի լիազորությունները վաղուց օրենքի ուժով դադարել են: Նա շարունակում է պաշտոնավարել օրենքի խախտմամբ: Նրանց ամբողջ խնդիրը կոնկրետ այդ հայցի լրացման հետ է կապված»,- ԼՈՒՐԵՐ.com-ի թղթակցի հետ զրույցում ասաց Պետրոսյանը:

Նկատենք, որ դատավորներ Կարինե Պետրոսյանի և Ալեքսեյ Սուքյանի խնդիրները ԲԴԽ-ի հետ երկար պատմություն ունեն: Դեռևս 2018 թվականի օգոստոսին Սնանկության գործերով դատարանի դատավորների ընտրության՝ ԲԴԽ-ի որոշումը նրանց մոտ դժգոհությունների տեղիք է տվել, և նրանք դիմել են ՀՀ վարչական դատարան՝ չեղարկելու որոշումը, սակայն նրանց հայցերը մերժվել են:

«Հաշվի առնելով այն հանգամանքները, որ վերջին շրջանում մեր որոշ հայցերի ընդունումը մերժվեց Վարչական դատարանի կողմից, մենք որոշեցինք, որ մեր հարցերի պատասխանները կգտնենք Մարդու իրավունքների եվրոպական դատարանում, որովհետև դա մեծ նշանակություն ունի մեր արդարադատության երաշխավորի՝ ԲԴԽ-ի լեգիտիմության համար»,- նկատեց Պետրոսյանը:

Ինչ վերաբերվում է 150 սնանկության գործ Սնանկության դատարան փոխանցելու նպատակով գրասենյակ չհանձնելուն, Պետրոսյանը նշեց, որ դրանք ավարտված գործեր են. «Ես հակված եմ սա ճնշում համարել, քանի որ Դատական  դեպարտամենտը առանձին սուբյեկտ չէ, և մենք ինչքան նամակներ գրել ենք ԲԴԽ-ին, մեզ պատասխանել են Դատական դեպարտամենտից: Իրենք նույն մարմինն են և այդ կոնկրետ ինֆորմացիայի պայմաններում, երբ գիտեն, որ 150 սնանկության գործերն ավարտված գործեր են, բայց կեղծ տեղեկատվություն են փոխանցում արդարադատության նախարարին, այդ դեպքում սա, բացի ճնշումից, ուրիշ բան չեմ համարում»,- նկատեց դատավորը:

Վերջինս նաև նշեց, որ առայժմ միայն իրավական գործողություն է իրականացնելու. «Բացատրություն կներկայացնեմ արդարադատության նախարարին, որ դա իրականությանը չի համապատասխանում, կուղարկեմ այն բոլոր գրությունները, որ բոլոր գործերը հանձնման ենթակա չեն: Եթե չկարճվի վարույթը, այդ ժամանակ հրապարակային կպայքարեմ»:

Արմինե ԱՐՄԵՆԱԿՅԱՆ