Ի՞նչ կարող է սովորեցնել բանակ չտեսած հրամանատարը բանակի մասին

Ինչպես արդեն տեղեկացրել ենք՝ ՀՀ վարչապետ Նիկոլ Փաշինյանը մարտի 25-ի երեկոյան աշխատանքային փակ հանդիպում է ունենալու Պաշտպանության նախարարությունում: Տեղեկությունը հայտնել էր վարչապետի մամուլի խոսնակ Վլադիմիր Կարապետյանը, սակայն չէր նշել, թե ինչ հանդիպում է լինելու։

Պարզելու համար թե ի՞նչ հարցեր են նախատեսում քնարկել՝ ԼՈՒՐԵՐ․com—ը զրուցեց ՊՆ մամուլի խոսնակ Արծրուն Հովհաննիսյանի հետ։

«Այսօր ՊՆ-ում փակ հանդիպում արդեն եղել է Պաշտպանության նախարարի, արտգործնախարարի, փոխվարչապետերի հետ, երեկոյան նախատեսվում է նաև վարչապետի հետ։ Դրանք կոչվում են օպերատիվ հավաքներ։ Այդ ժամանակ երկրի զինված ուժերի, այլ ուժային կառույցների օպերատիվ օղակի հրամանատարները տարին մեկ, երկու անգամ գալիս են դասընթացների»,- փոխանցեց Հովհաննիսյանը։ 

Հարցին՝ ո՞ւմ նախաձեռնությամբ է կազմակերպվել հանդիպումը, Արծրուն Հովհաննիսյանը նշեց․ «Պաշտպանության նախարարության պլանային միջոցառում է, որը կատարվում է յուրաքանչյուր տարի»,- նշեց նա։

Այսինքն՝ դասախոսությունը լինելու է երկրի ռազմաքաղաքական ղեկավարության կողմից բարձր ու միջին հրամկազմի համար։ Սա նշանակում է, որ դասախոսություն կարդալու է նաև ԶՈւ գերագույն-գլխավոր հրամանատար Նիկոլ Փաշինյանը։ Հարց է առաջանում՝ ի՞նչ է սովորեցնելու երկրի վարչապետը հրամկազմին, եթե ինքը  չի ծառայել բանակում։

Նշենք, որ իր՝ ծառայած չլինելու հանգամանքը Փաշինյանը պարզաբանել է հետևյալ կերպ․ «90-ականների սկզբին գործել է օրենք, որ եթե ընտանիքի երկու արու զավակները ծառայել են բանակում, ապա երրորդը ազատվում էր զինվորական ծառայությունից։ Իմ երկու ավագ եղբայրները ծառայել էին բանակում, և ուրեմն` օրենքը կիրառվել է իմ նկատմամբ»,- նշել է նա: