Գնաճը տնտեսական աճի անհրաժեշտ նախապայմաններից է․ նախարար

2019թ․ օրենքով սահմանված կարգով կարող է լինել թույլատրելի 4 տոկոսից ոչ ավելի գնաճ: Այս մասին ԱԺ-ում լրագրողներին հայտնել է տնտեսական զարգացման և ներդրումների նախարար Տիգրան Խաչատրյանը:

Թե որ ապրանքները կթանկանան, նախարարը նշեց, որ դա կախված է շուկայի և ապրանքների նկատմամբ պահանջարկի գնահատականներից:

Լրագրողների հարցին, թե քաղաքացիները չե՞ն զգալու տատանումները, իրենց գրպանի վրա չի՞ արտացոլվելու բացասական առումով, Տիգրան Խաչատրյանն ասաց.

«Բոլոր դեպքերում քաղաքացիները կզգան, 1 տոկոսի լինի՝ 1 տոկոսի չափով կզգան, երկուսի դեպքում երկու, երեքի՝ երեք։ Այդ բարձրացող գները եկամուտներ են ապահովում մյուս կողմից ձեռնարկությունների համար, համապատասխանաբար, աշխատավայրերում տեղի են ունենում աշխատավարձերի որոշակի բարձրացումներ, դա տնտեսական աճի անհրաժեշտ նախապայմաններից է»,- ասաց Տիգրան Խաչատրյանն ու հավելեց, որ գնաճը չի սպառնում մեր քաղաքացիների բարեկեցությանը։ Սովորաբար գնաճ արձանագրվում է այն պատճառով, որ տնտեսության մեջ առկա են սահմանափակ ռեսուրսներ, և տնտեսավարող սուբյեկտների միջև պայքարը ստիպում է, որ ռեսուրսի համար մեկը պատրաստ լինի վճարել ավելի բարձր, քան վճարում էր երեկ։