49-ամյա մորը դանակահարած որդին հայտնաբերվեց (տեսանյութ)

Ապրիլի 1-ին՝ ժամը 20-ն անց 50-ի սահմաններում, շտապօգնության ենթակայանից ոստիկանության Նոր Նորքի բաժին հաղորդել են, որ կանչով մեկնել են Գայի պողոտայի 1-ին շենքի թիվ 31 բնակարան, որտեղ կնոջ դի կա։ Այս մասին հայտնում են ՀՀ ոստիկանությունից:

Ահազանգին արագ արձագանքած ոստիկանության և քննչական կոմիտեի ծառայողները պարզել են, որ 49-ամյա կնոջը դանակահարել են։ Բնակարանում հայտնաբերել են արնանաման հետքեր և արնանման հետքերով դանակ, որը, նախնական վարկածով՝ հանցագործության գործիքն է։ Հարուցվել է քրեական գործ՝ սպանության հատկանիշներով։

Նոր Նորքի քրեական հետախույզները տեղում պարզել են, որ կնոջից բացի, տանը եղել են նրա որդիները, որոնցից ավագը չկար։ Կինը դանակահարվել էր խոհանոցում։ Այդ ժամանակ փոքր որդին հյուրասենյակում էր եղել և արդեն դանակահարված մոր ճիչերն էր լսել։

Վարկած է առաջ քաշվել, որ կնոջը դանակահարել է ավագ որդին։
Հետագա միջոցառումներով իրավապահների կասկածները հիմնավորվել են։ Նոր Նորքի ոստիկանները սկսել են 25-ամյա Հակոբ Խանամիրյանի որոնումները։ Երիտասարդին րոպե առաջ հայտնաբերելու նպատակով ձևավորվել են օպերատիվ խմբեր, որոնք ստուգել են ողջ վարչական շրջանը։

Արդյունքում դեպքից մեկ ժամ էլ չանցած որոնվողը հայտնաբերվել է Նոր Նորքի Դավիթ Մալյան փողոցում և սպանության կասկածանքով բերման ենթարկվել ոստիկանության Նոր Նորքի բաժին։
Հակոբ Խանամիրյանը ոստիկանությունից ներկայացվել է դեպքի նախաքննությունը վարող տարածքային քննչական բաժին, որտեղ ձերբակալվել է։

Դեպքի հանգամանքները հետախուզական միջոցառումներով ու քննչական գործողություններով պարզվում են։