Հայոց պատմությունն ու մշակույթն ինձ հոգեհարազատ են. Նատալիա Օրեյրոն հանդիպեց լրագրողների և երկրպագուների հետ (տեսանյութ)

«Վայրի հրեշտակը» հանրահայտ հեռուստանովելից սիրված դերասանուհի և երգչուհի Նատալիա Օրեյրոն ապրիլի 7-ին  Կ. Դեմիրճյանի անվան մարզահամերգային համալիրում կայանալիք համերգին ընդառաջ Երևանում հանդիպեց լրագրողների հետ:

Նա ասաց, որ Արգենտինայի և Ուրուգվայի հայկական համայնքների շնորհիվ ծանոթ է հայոց պատմությանը, մշակույթին և անգամ խոհանոցին:

«Ինձ համար շատ առանձնահատուկ պահ է, քանի որ առաջին անգամ եմ այցելում Հայաստան: Արգենտինայում և Ուրուգվայում հայերին շատ են սիրում»,- նշեց Օրեյրոն: 

Նա խոստովանեց, որ մինչև Հայաստան ժամանելը, տասներկու համերգային ծրագրով է հանդես եկել այլ երկրներում և հոգնածության  պատճառով չի հասցրել շրջել Երևանում: «Ամուսինս և որդիս  պտտվել են ամբողջ քաղաքում: Նրանք ինձ  ասացին, որ եղել են հետաքրքիր ու տեսարժան վայրերում: Իրենց հետ երկար հաց` լավաշ էին բերել, որը մենք վայելեցինք ամբողջ երեկոյի ընթացքում, շատ համեղ է Հայաստանի նուռը»,-պատմեց երգչուհին: 

Խոսելով իր ստեղծագործական կյանքի մասին` Օրեյրոն նշեց, որ թվում է, թե այն մարդիկ, որոնք իրենց սիրած աշխատանքով են զբաղվում, պետք է մշտապես երջանիկ լինեն, այնինչ ընդհանուր վազքի, լարվածության և գերհոգնածության արդյունքում երբեմն հուսահատվում են ու հանգստի պահանջ զգում: «Նման իրավիճակներում ինձ փրկում է բնությունը, սիրում եմ ժամանակ անցկացնել բնության գրկում, վայելել այն»,-անկեղծացավ նա: 

Լրագրողներից մեկի այն հարցին, թե այժմ ինչ հարաբերություններ ունի «Վայրի հրեշտակը» ֆիլմում իր սիրելի տղամարդուն մարմնավորած դերասան Ֆակունդո Արանայի հետ, Նատալիան պատասխանեց, որ իրենք ընկերներ են:

«Մարտի 31-ին Ֆակունդոյի տարեդարձն էր, ես համերգի էի: Բեմից  զանգահարեցի նրան, երկրպագուներիս հետ շնորհավորեցինք: Միշտ ասել եմ, որ այն բոլոր երկրներում, ուր այցելում եմ, Ֆակունդոյին շատ են սիրում:  Ես ստիպված եմ լինում ճամպրուկ գնել նրա երկրպագուների նվերները Ֆակունդոյին հասցնելու համար: Նա պետք է ինձ ուղեկցի իր ճամպրուկի գումարը վճարելու համար»,- կատակեց Օրեյրոն:

Անդրադառնալով ԱՄՆ-ում գործունեություն ծավալելու հնարավոր ցանկությանը` «վայրի հրեշտակն» ասաց, որ միշտ երազել է դերասանուհի դառնալ, բայց երբեք նպատակ չի ունեցել մայրենիից բացի այլ լեզվով դերեր խաղալ: «Չեմ կարող բացատրել թե ինչու,  բայց ԱՄՆ-ում լինելիս միշտ տխրություն ու դատարկություն եմ զգում:  Նման հոգեվիճակ երբեք չեմ ունենում, երբ Եվրոպայում եմ կամ Ասիայում: ԱՄՆ-ում աշխատելու առաջարկներ եղել են, բայց չեմ ընդունել:  Ցանկացել եմ, որ իմ երգարվեստն ու ֆիլմարվեստը ճանաչվի ամբողջ աշխարհում, բայց երբ առաջարկում են երգել անգլերեն, պատասխանում եմ` ոչ: Եթե ես Ռուսաստանում, Չեխիայում, Հայաստանում և այլուր երգում եմ իմ լեզվով և ինձ լսում, սիրում ու գնահատում են, ապա ինչո՞ւ պետք է ԱՄՆ-ում անգլերեն երգեմ: Չեմ կարծում, որ լավ է կամ վատ փորձել նվաճել ամերիկյան շուկան,  բայց ես որոշում եմ կայացրել երգել իմ լեզվով և այն տարածել աշխարհով մեկ»,-շեշտեց նա:

Նատալիա Օրեյրոյի երևանյան համերգի շրջանակներում տեղի կունենան մի շարք երգերի պրեմիերաներ: Արտիստը բեմում կլինի իր հետ ժամանած երաժիշտների ու պարային խմբի հետ: Օրեյրոն վստահ է՝ այս համերգն իր երկրպագուները երբեք չեն մոռանա:

Երևանյան համերգի օրը պատահական չէ ընտրված. այն նվիրված է Մայրության և գեղեցկության տոնին: Տեսանյութը՝ News.am-ի։