Հայաստանում մոնիթորինգ կանցկացվի. տրանսգենդերի ելույթի հետևանքները

Օրեր առաջ «Լուսավոր Հայաստան» խմբակցության ղեկավար Էդմոն Մարուքյանը լրագրողների հետ զրույցում հայտարարել էր, որ տրանսգենդեր կնոջ ելույթից հետո Հայաստանը խնդիրներ ունի ԵԽԽՎ-ում։

Թեմայի շուրջ ԼՈՒՐԵՐ.com-ը զրուցեց «Իմ քայլը» խմբակցության պատգամավոր, ԵԽԽՎ պատվիրակության անդամ Սոս Ավետիսյանի հետ։

«Հարցի քննարկման համար ստեղծվել է հանձնաժողով, որպեսզի մոնիտորինգ անցկացվի այդ երեք երկրներում՝ Հայաստան, Ադրբեջան, Վրաստան։ Վստահ եմ, որ պարոն Էդմոն Մարուքյանը, որպես այդ հանձնաժողի ղեկավար, կարող է մեր երկրում եղած իրավիճակը շատ կարճ և լավ ներկայացնել»,-ասաց Սոս Ավետիսյանը։

Հարցին, թե արդյո՞ք Հայաստանն ունի նշված խնդիրները, Սոս Ավետիսյանն ասաց. «Ես չեմ կարող դատողություններ անել Ադրբեջանի կամ Վրաստանի հասարակության մասին։ Կա մոնիթորինգային ծրագիր, որն ամբողջ Հարավային Կովկասում անելու է մոնիթորինգ՝ մարդկանց իրավունքների վերաբերյալ։ Այստեղ որևէ ֆենոմենալ կամ դժվար բան չկա, ուղղակի, օրինակ՝ Էդմոն Մարուքյանը, Նաիրա Զոհրաբյանը պետք է զբաղվեն այդ հարցերով»։

Հարցին՝ այս թեմայի շրջանակներում Հայաստանն արժանացե՞լ է քննադատությունների, ԵԽԽՎ պատվիրակության անդամը պատասխանեց. «Թե՛ եվրոպական երկրներում, թե՛ Հայաստանում՝ կան հասարակության շերտեր, որոնք չեն ընդունում այդ համայնքին։ Իհարկե, Եվրոպայում ավելի շատ է հանդուրժողականությունը, Հայաստանում այն ավելի ցածր մակարդակի վրա է։ Իհարկե, քննարկումներ լինում են, բայց դրանից այն կողմ՝ Հայաստանի հետ կապված խնդիրներ չկան։ Որևէ քննարկում ԵԽԽՎ-ում այս թեմայի շուրջ չի եղել, բացի Նիկոլ Փաշինյանին ուղղված հարցը»։

Պատգամավորը նշեց, որ միայն մոնիթորինգի ավարտից հետո պարզ կլինի, թե ինչ խնդիրներ կան Հայաստանում, կապված մարդու իրավունքների պաշտպանության հետ։