Թող աշխարհի ոչ մի ազգի մոտ կասկածի տակ չդրվի մեր հարաբերությունների բարձր մակարդակը. Ալեքսեյ Սանդիկով (լուսանկարներ)

Ազգային ժողովի այգու` քաղաքացիների համար նախատեսված բաց հատվածում տեղի ունեցավ հայ-ռուսական բարեկամական հարաբերությունների ամրապնդմանը միտված ծառատունկ:

ԼՈւՐԵՐ.com-ի հետ զրույցում պատգամավորներն անկեղծացան, թե մտքում ինչ ցանկություն են պահել ծառերը տնկելիս:

Ալեքսեյ Սանդիկով. «Իմ քայլը» խմբակցության պատգամավոր, ռուսական համայնքի ներկայացուցիչ.

«Ծառը տնկելիս ցանկություն պահեցի, որ մեր երկու ազգերը միշտ լինեն բարեկամներ` եղբայրական հարաբերություններով և աշխարհի ոչ մի ազգի մոտ կասկածի տակ չդրվի մեր հարաբերությունների բարձր մակարդակը»:

ԱԺ փոխնախագահ Վահե Էնֆիաջյան.

«Ցանկությունս այն է, որ հայ-ռուսական հարաբերությունները ամուր հիմքերի վրա լինեն, դինամիկ զարգանան: Մեր հարաբերությունները դարերի պատմություն ունեն, և ես վստահ եմ, որ մենք փայլուն ապագա ենք ունենալու: Ծառուղու, այս խորհրդանշական արարողությունը շատ եմ կարևորում, և այս ծառերն իրենց տեսքով և արմատով վառ հուշ կմնան այն մասին, որ հայ-ռուս հարաբերությունները եղել են, կան և կլինեն»:

ԱԺ փոխնախագահ Լենա Նազարյան. 

«Ծառ տնկելիս ես միայն բնապահպանության մասին եմ մտածում իրականում: Այս տեսակի ծառը` կեչին, շատ եմ սիրում, քանի որ իմ տատիկն էլ է ռուս: Ցանկանում եմ, որ ծառը աճի, ծաղկի և ամեն տարի տերևներ առաջանան»:

ԱԺ փոխնախագահ Ալեն Սիմոնյան.

«Անկեղծ ասած՝ ցանկություն չէի պահել: Ես հիշում եմ, որ անցյալ տարի այս ժամանակ, մենք ամենուր ծառ էինք տնկում և ամեն ծառ իր խորհուրդն ուներ: Իմ մեծ ցանկությունն անցյալ տարի իրականացավ»:

«Իմ քայլը» խմբակցության ղեկավար Լիլիթ Մակունց.

«Հուսամ, որ իսկապես շատ ամուր ծառ կլինի, տարիներ շարունակ կանգուն կմնա: Կոնկրետ ցանկություն չեմ պահել, բայց ծառ տնկելուց հետո քեզ լավ ես զգում, երբ այն աճում է: Սա իհարկե խորհուրդ ունի և՛ պետությունների բարեկամական մթնոլորտի և՛ հայ-ռուսական հարաբերությունների համար»:

Ծառատունկի ընթացքում տեղի ունեցավ նաև հյուրասիրություն` ռուսական բուլկիներ, կոնֆետներ, կվաս և կենացներ` բարեկամ պետությունների հարաբերություններն ամրապնդելու մաղթանքներով: