Սերժ Սարգսյանն առնվազն պետք է սկսի հանրությանը ներկայացնել իր կատարած սխալները․ Արտակ Մանուկյան

«Ինձ թվում է, որ ոչ միայն իմ, այլև հասարակության մեծ մասի զգացողությունները նույնն էին անցյալ տարի այս օրը: Սկզբում չէինք հավատում, երբ Սերժ Սարգսյանի հրաժարականի տեքստը լսվում էր, հետո ուրախության և հպարտության պահեր էինք ապրում, երբ զգում էինք, որ կարողացել ենք փոխել ինչ-որ բան»,-ԼՈւՐԵՐ.com-ի հետ զրույցում հայտարարեց «Իմ քայլը» խմբակցության պատգամավոր Արտակ Մանուկյանը` վերհիշելով մեկ տարի առաջ այս օրը հայ ժողովրդի պահանջով ՀՀ երրորդ նախագահ Սերժ Սարգսյանի` պաշտոնից հրաժարականի դիմումի և հաղթանակած զգացողությունների մասին:

Պատգամավորի խոսքով` չափազանց կարևոր է, որ մարդը հասկանա, որ կարող է իր մտածողությունը և նույն մտածողությամբ բազմությունը ազդել որոշումների վրա և թելադրել իր կամքը: Հարցին, թե Սերժ Սարգսյանը ինչ կարող է խոսել, երբ ասում է՝ ժամանակը կգա կխոսեմ, կամ՝ որ հայտարարեց, որ կգա օրը, երբ հարցերի քչություն կլինի, պատասխանների՝ ոչ, Արտակ Մանուկյանը պատասխանեց.

«Ի՞նչ իմանամ՝ Սերժ Սարգսյանն ինչ նկատի ունի: Առնվազն պետք է սկսի հանրությանը ներկայացնել իր կատարած սխալները, թե այս դադարի ժամանակահատվածում նա ինչ կփոխեր, և սխալների շտկման իր մոտեցումները ներկայացնի, որպեսզի ապագայում այդ սխալները չկրկնվեն»:

Սիլվի ՏԻԳՐԱՆՅԱՆ