Միշտ կա 3-րդ ճանապարհ. «փոխհրաձգություն»՝ Երևանի ավագանու ընդդիմադիր և իշխանական անդամների միջև

Ինչպես արդեն տեղեկացրել ենք, այսօր՝ ապրիլի 23-ին, Երևանի ավագանու ֆինանսավարկային և տնտեսական հարցերի մշտական հանձնաժողովի նախագահ ընտրվեց Լևոն Հովհաննիսյանը, իսկ հանձնաժողովի նախկին նախագահ Աշոտ Մնացականյանի պաշտոնավարումը դադարեցվեց՝ իր դիմումի համաձայն։ Վերջինս նաև «Հայավտոկայան» ՓԲԸ-ի տնօրենն է։ 

Երևանի ավագանու այսօրվա նիստում «Լույս» խմբակցության նախագահ Դավիթ Խաժակյանը հայտարարեց, որ «Իմ քայլը» խմբակցության անդամ Աշոտ Մնացականյանը չի մասնակցում նիստերին՝ ապա մեջբերեց «Երևան քաղաքում տեղական ինքնակառավարման» մասին օրենքի 20-րդ հոդվածը, ըստ որի՝ նիստերին չմասնակցելու դեպքում նախատեսում է դադարեցնել ավագանու անդամի լիազորությունները: Խաժակյանը, դիմելով «Իմ քայլը» խմբակցության ղեկավար Սուրեն Էյրամջյանին՝ ասաց․ «Ձեր ավագանու անդամներից մեկն, ով նաև պետական պաշտոնյա է, ակտիվ ֆեյսբուքյան գործունեություն է ծավալում ու հաճախ հարկ է համարում նաև անդրադառնալ մեր կուսակցության ղեկավարին։ Սրանով պայմանավորված նրա նկատմամբ ունեմ առանձնահատուկ վերաբերմունքով, և  նկատում եմ նրա բացակայությունը այս նստաշրջանում», - ասաց նա՝ նշելով, որ Մնացականյանն ընդհանրապես չի մասնակցում նիստերին։ 

ԼՈՒՐԵՐ․com-ը «Իմ քայլը» խմբակցության անդամ, «Հայավտոկայան» ՓԲԸ-ի տնօրեն Աշոտ Մնացականյանից հետքրքրվեց, թե ինչո՞ւ չի մասնակցում Երևանի ավագանու նիստերին, ինչին Մնացականյանը պատասխանեց․ «Ուզում եմ նշել, որ բացակայությունների պատճառ է հանդիսացել աշխատանքային ծանրաբեռնվածությունս։ Իմ հանձնաժողովի նիստերը վարել եմ, սակայն ավագանու նիստերին ֆիզիկապես ներկա չեմ գտնվել աշխատանքային օբյեկտիվ պատճառներով։ Կարծում եմ՝ հաջորդ նիստերին պարոն Խաժակյանն այլևս դիվիդենտներ չի հավաքի իմ մասով»,- ասաց նա։