Ինչո՞ւ է ՀՀ ԱԳՆ-ն խուսափում պատասխանել Բաքվից հնչող հայտարարություններին

Ադրբեջանի և Եվրամիության միջև ռազմավարական գործընկերության մասին նոր համաձայնագիրը կստորագրվի մայիսի 13-ին: Այդ մասին, ինչպես հայտնում է minval.az-ը, հայտարարել է Ադրբեջանի խորհրդարանի խոսնակ Օքթայ Ասադովը:

Ըստ նրա՝ համաձայնագրի նախագծում տեղ է գտել նաև Լեռնային Ղարաբաղին վերաբերող կետ, ինչպես նա է ասել՝ «Ադրբեջանի տարածքային ամբողջականության խախտման փաստը»:

«Դա շատ կարևոր հարց է, մենք երկար ենք աշխատել դրա վրա և հասել ենք նրան, որ այդ համաձայնագրում ներառվեն Ադրբեջանի տարածքային ամբողջականությանը վերաբերող կետեր»,- ասել է խորհրդարանի խոսնակը:

Նա մեղադրել է հայերին Ադրբեջան-ԵՄ ռազմավարական գործընկերության մասին նոր համաձայնագրի ստորագրմանը «խոչընդոտելու փորձերի» համար: 

ԼՈՒՐԵՐ.com-ի հետ զրույցում ՀՀ ԱԳՆ մամուլի խոսնակ Աննա Նաղդալյանը ոչ հերքել, ոչ էլ՝ հաստատել էր: Սակայն ավելի ուշ պաշտոնապես արձագանքել է Ադրբեջանի ԱԺ խոսնակի հայտարարությանը, նշելով, որ գործընկեր երկրների հետ ԵՄ բանակցվող տեքստերը հրապարակային չեն՝ հասանելի լինելով միայն գործընթացին անմիջական ներգրավվածություն ունեցող կողմերին: Միևնույն ժամանակ նա ընդգծել է, որ Հայաստանը բազմիցս ամենատարբեր մակարդակներով և հարթակներում շեշտել  և ևս մեկ անգամ ընդգծում է, որ անընդունելի է համարում այս հարցում որևէ երկակի դիրքորոշման որդեգրումը, որը կարող է հակասել ԼՂ հիմնահարցի կարգավորման միջազգային մանդատ ունեցող ձևաչափի` Մինսկի խմբի համանախագահության մոտեցումներին և խաթարել խաղաղության գործընթացը:   

ՀՀ ԱԳՆ նման արձագանքը իրականում ոչ հերքում, ոչ էլ հաստատում է Բաքվից հնչող հայտարարությունները: Ընդհանրապես նոր կառավարության ուղղությամբ քննադատություն է հնչում այն առումով, որ ԵՄ-Ադրբեջան ընդունվելիք փաստաթղթում Արցախի վերաբերյալ գնահատականները չեն լինի այնպիսին, ինչպիսին ամրագրված են ԵՄ-Հայաստան փաստաթղթում: Նման զարգացումների դեպքում կստացվի, որ ԵՄ-ն Ադրբեջանի հետ հարաբերությունները չփչացնելու համար՝ Հայաստանի համար նպաստավոր դրույթները չի ներառել Ադրբեջանի հետ փաստաթղթում:

 

Առհասարակ, հայկական դիվանագիտությունը աշխատո՞ւմ է այս համատեքստում՝ այնքան էլ պարզ չէ: