Հայ դատի հիմնական պայքարի առանցքը՝ մոտակա ժամանակներում

Ցեղասպանության ճանաչման գործընթացը չի կարող հիմնական օրակարգը լինել, այն պետք է զուգակցվի նաև հատուցման օրակարգով: Այս մասին լրագրողների հետ զրույցում ասաց Հայ հեղափոխական դաշնակցություն կուսակցության անդամ Արծվիկ Մինասյանը։

«Հատուցում պետք է լինի ամբողջական հայրենիք ունենալու սկզբունքի հիմքի վրա: Ոչ թե լինի ուղղակի նյութական փոխհատուցում իրենց սեփականությունը կորցրած հայ ժողովրդի զավակներին, այլ հատուցում հայրենիք վերակառուցելու սկզբունքով։ Կարծում եմ՝ մոտակա ժամանակներս սա է լինելու հայ ժողովրդի պահանջը և Հայ դատի հիմնական պայքարի առանցքը»,-ասաց Մինասյանը։

Հարցին՝ արդյո՞ք հեղափոխությունից հետո բյուրոն շարունակում է աշխատել տարբեր երկրներում գործող կազմակերպությունների հետ, Մինասյանը պատասխանեց. «Միանշանակ, աշխատանքները շարունակվում են։ Ասեմ ավելին, որ մենք տարբեր ուղղություններով ունենք ոչ միայն նոր ձեռքբերումներ, այլև նոր հնարավորություններ, որոնք թույլ կտան նաև այլ երկրներում, այլ գործակից ազգեր և իշխանություններ ներգրավենք այս աշխատանքի մեջ։ Համոզված կերպով ասում եմ, որ ՀՅԴ-ն և Հայ դատի գրասենյակը լայն թափով աշխատում են։ Եվ մեր գլխավոր խնդիրն է համահայկական ներուժի համախմբումը այս նպատակի լիարժեք իրացման հարցում»։

Մինասյանը նշեց, որ դրական է գնահատում հայասատանյան լոբբինգը, հաշվի առնելով ԱՄՆ 49-րդ նահանգի և Իտալիայի խորհրդարանի կողմից ցեղասպանության ընդունումը։

«Դրական եմ գնահատում, սակայն չպետք է բավարարվել։ Պետք է ոչ միայն պետություններն ամբողջությամբ ընդունեն Հայոց ցեղասպանությունը, այլև ձևավորվի հատուցման օրակարգը։ Վերջնական կետը՝ ճանաչում, հատուցում և ամբողջական հայության միատեղում՝ իր պատմական հայրենիքում»,-ասաց Մինասյանը: