Երբ է Միհրան Պողոսյանը լքել Հայաստանը․ ՀՔԾ-ն պարզաբանում է

Այս օրերին բուռն քննարկվում է ԴԱՀԿ նախկին ղեկավար Միհրան Պողոսյանի կողմից Ռուսաստանից քաղաքական ապաստան խնդրելու հանագմանքը։ ԼՈՒՐԵՐ․com-ը նախաքննական մարմնից հետաքրքրվեց, թե ինչպես եղավ, որ Միհրան Պողոսյանը լքեց երկիրը, արդյոք նախքան հետապնդո՞ւմն է հատել Հայաստանի սահմանը, թե՞ դրանից հետո։

Մեր հարցին ի պատասխան Հատուկ Քննչական ծառայության մամուլի խոսնակ Մարինա Օհանջանյանն ասաց, որ Միհրան Պողոսյանը Հայաստանի Հանրապետությունից մեկնել է 2018 թվականի հոկտեմբերի 7-ին, իսկ այդ ժամանակ վարույթն իրականացնող մարմինը չէր կարող կանխել վերջինիս մեկնումը ՀՀ-ից, քանի որ անձի ազատ տեղաշարժի իրավունքը կարող է սահմանափակվել նրա նկատմամբ խափանման միջոցի առկայության դեպքում:

«Խափանման միջոցը կիրառվում է միայն կասկածյալի և մեղադրյալի նկատմամբ, իսկ Միհրան Պողոսյանը նշված ժամանակահատվածում մեղադրյալի կամ կասկածյալի կարգավիճակ չի ունեցել: Դեռ ավելին, այդ ժամանակ նրա վերաբերյալ քրեական գործ Հատուկ քննչական ծառայությունում ընդհանրապես չի քննվել: Քրեական գործը, որով կատարված նախաքննության ընթացքում ի հայտ են եկել Միհրան Պողոսյանի վերաբերյալ նախկինում վարույթը կարճված քրեական գործով վարույթը վերսկսելու նոր երևան եկած հանգամանքներ, ՀՔԾ-ում վարույթ է ընդունվել միայն 2018 թվականի հոկտեմբերի 15-ին: Այդ քրեական գործի քննության արդյունքներով` ՀՀ գլխավոր դատախազի կողմից քրեական գործով վարույթը կարճելու մասին որոշումը վերացվել է 2019 թվականի հունվարի 17-ին, և քրեական գործը նախաքննության կատարման համար ուղարկվել է ՀՔԾ»,- փոխանցեց Օհանջանյանը։

Նրա խոսքով՝ երկու քրեական գործերը միացվել են, կատարվում է նախաքննություն։

Սոնա Հարությունյան