Ռոբերտ Քոչարյանը եկել է դատարան այն ճանապարհով, որն անհրաժեշտ է համարել իր անվտանգության ծառայությունը. պաշտպան

Ռոբերտ Քոչարյանը միշտ եկել է դատարան այն ճանապարհով, որ ճանապարհով անհրաժեշտ է համարել իր անվտանգության ծառայությունը, որովհետև ինքն այդ պաշտոնատար անձանցից մեկն է, որի վրա տարածվում են օրենքի մի շարք դրույթներ, այդ թվում նաև, թե ինչպես պետք է կազմակերպվի իր անվտանգությունը։

Այս մասին այսօր՝ հունիսի 14-ին, լրագրողների հետ զրույցում ասաց Ռոբերտ Քոչարյանի փաստաբան Հայկ Ալումյանն՝ անդրադառնալով դատական նիստի սկզբում մեղադրող դատախազ Գևորգ Բաղդասարյանի այն հայտարարությանը, որ Ռոբերտ Քոչարյանն, արդեն երկրորդ անգամ,  դատարան է մտնում փակ՝ դատավորների համար նախատեսված  մուտքից։ 

Դիտարկմանը, թե երբ դատախազն էր դատավորի մուտքից ներս մտել իրենք հայտարարությամբ հանդես եկան, արդյո՞ք սա նույն իրավիճակը չէ, Ալումյանը պատասխանեց․ 

«Սա նույն իրավիճակը չէ։ Դատախազն ու Հանրապետության նախկին նախագահը նույն մակարդակի վրա չեն կարող լինել, նույն կանոնները չեն տարածվում դատախազի վրա, որոնք տարածվում են պաշտոնաթող նախագահի վրա։ Դատախազությունը մի փոքր շփոթել է, դատախազությանը թվացել է, թե պարոն Քոչարյանը դատարանի նիստերի դահլիճում գտնվող դատավորի դռնից է ներս մտել, իրականում, պարոն Քոչարյանն այդտեղից չի ներս մտել, նա ներս է մտել ուրիշ դռնից, իսկ դահլիճ մտել է այն  նույն դռնով, որով մենք բոլորս ենք մտնում, ուղղակի ինքը փողոց չի դուրս գալիս նույն դռնով, ինչ մենք բոլորս, ինքը դուրս է գալիս ուրիշ մուտքով, և դա որոշում է իր անվտանգության ծառայությունը, քանի որ իրենք իրենց կանոններն ունեն, թե որ տարածք որ մուտքով մտնեն»։