Չեմ գնում ԲԴԽ որպես «Իմ քայլի» ներկայացուցիչ. Բեքմեզյան

Բարձրագույն դատական խորհրդի անդամի թեկնածու Գրիգոր Բեքմեզյանն այսօր հանդիպեց խորհրդարանական «Իմ քայլը» խմբակցության պատգամավորների հետ։

Բեքմեզյանը լրագրողների հետ զրույցում հայտնեց, որ մի շարք հարցեր են քննարկել, այդ թվում՝ դատական համակարգի բարեփոխումների վերաբերյալ։ ԲԴԽ անդամի թեկնածուի կարծիքով՝ խորհրդի անդամների հրաժարականներն արդեն հուշում են, թե այս մեկ տարվա ընթացքում ինչպես է աշխատել ԲԴԽ-ն․ «Այսինքն՝ եթե իրենք հասկանային, որ լավ են աշխատել և արդյունավետ, չէին լինի հրաժարականներ և կոնֆլիկտ՝ Դատավորների ընդհանուր ժողովի հետ»,- նշեց Բեքմեզյանը։

Նա հավելեց, որ մեկ տարին բավարար չէ, որ վերջնական գնահատական տանք, բայց փաստ է, որ դատական համակարգի ճգնաժամ եղավ, որի մեջ մեղավոր է նաև ԲԴԽ-ն, քանի որ ինչ-որ տեղ թերացումներ են եղել. «Բարձագույն դատական խորհուրդը անսպասելի անկախ է եղել, միգուցե չի հասկացել՝ ինչ պետք է անի։ ԲԴԽ անդամները նշանակվել էին նախորդ իշխանության օրոք, երբ դեռ ՀՀԿ-ն էր, նշանակվել էին որոշակի ազդեցությամբ, երբ իշխանություն փոխվեց, հանգեցինք իրավիճակի, երբ երկրում փոխվեց իշխանական համակարգը, դատական համակարգի նկատմամբ մոտեցումը։ Հասկանալի է, որ խնդիրները գալիս են նախկին իշխանությունից, բայց փոփոխությունից հետո անջրպետ առաջացավ, դատական համակարգն սկսեց այլեւս ցուցումներ չստանալ ներկա իշխանությունից, որի արդյունքում սկսեց մտածել՝ բա ումի՞ց ստանանք․ ինքը սովորել է հանձնարարականներ ստանալ, հիմա չկան դրանք»,- ընդգծեց ԲԴԽ անդամի թեկնածուն։

Բեքմեզյանն ասաց, որ եթե ընտրվի խորհրդի անդամ, նախ՝ մյուս անդամների հետ Դատավորների ընդհանուր ժողով-ԲԴԽ հարաբերությունները պետք է կարգավորեն։ Նա վստահեցրեց, որ անկախ ամեն ինչից՝ լինելու է անկախ, և ԲԴԽ չի գնում որպես «Իմ քայլի» ներկայացուցիչ, այլ ԱԺ-ի կողմից ընտրված անդամ։