Իմ կարծիքով՝ այդ ակցիաները ավելի շատ քաղաքական էին, քան տնտեսական․ պատգամավորը՝ «Ահազանգի» մասին

«Իմ կարծիքով՝ այդ ակցիաները ավելի շատ քաղաքական էին, քան տնտեսական»,- «Ահազանգ» նախաձեռնության ակցիաների վերաբերյալ ԼՈՒՐԵՐ․com-ի հետ զրույցում ասաց «Իմ քայլը» խմբակցության պատգամավոր Եղիշե Սողոմոնյանը։ Պատգամավորի խոսքով՝ նախաձեռնության անդամները օրենքի ամբողջ փաթեթից վերցրել են միայն մեկը և բողոքում են դրա դեմ։

«Փորձեմ մի քանի հիմնավորումներ ներկայացնել։ Տեսեք՝  համահարթ հարկման դեպքում մենք լավ պայմաններ ենք ստեղծում օտարերկրյա ներդրողների համար, խթանում ենք բարձր արտադրողական աշխատանքը, մրցակցային դաշտ ենք ստեղծում հարևան երկրների  հետ, համահարթ հարկումը նպաստում է տնտեսական աճին։ Մյուս կողմից՝ սխալ ընակալում կա, երբ ասում են, որ 150․000 դրամից ցածր աշխատավարձ ստացող մարդկանց վիճակը վատանալու է, ես դրա հետ համաձայն չեմ։ Առաջին հերթին պետք է հասկանալ, որ այդ մարդկանց մեծամասնության մոտ միայն պայմանագրով է աշխատավարձը ցածր 150․000-ից, իրականում, նրանք ավելի բարձր են ստանում։ Երբ մենք ասենք ներդրողներին, որ Հայաստանում գործում է եկամուտների հարկման համահարթ մոդել` դրա մեսիջը ավելի մեծ օգուտներ կբերի երկրին, քան՝ պրոգրեսիվի դեպքում»,- ասաց պատգամավորը։

Պատգամավորը նշեց, որ մի շարք համակարգերում աշխատավարձերի բարձրացումներ են եղել և դրանք շարունակական են լինելու։ Դրանք միտված են այն անձանց, ովքեր սոցիալապես խոցելի են։ Հարկային օրենսգրքում կատարվել են նաև այլ բարեփոխումներ, որոնք, ըստ պատգամավորի, մեծ հնարավորություն են տալիս բիզնեսի ընդլայնմանը։ Սողոմոնյանը հակադարձում է այն կարծիքին, թե 150․000 դրամից ցածր աշխատավարձ ստացող մարդկանց համար փոփոխություններ չեն լինելու, նա պնդում է՝ փոփոխություններ լինելու են, այն էլ` դրական։  Պատագամվորն առանձնացրել է ավելի քան 25 կետ, որոնք փաստում են համահարթ հարկան դրական փոփոխությունները։

Հարցին, թե արդյո՞ք անհրաժեշտություն չկա հասարակությանը ավելի պարզ լեզվով բացատրել, թե ինչ է համահարթ հարկումը, միգուցե բողոքների պատճառը նախագիծը լիարժեք չհասկանալն է, Եղիշե Սողոմոնյանը պատասխանեց․

«Այո՛։ Ոչ ոք աշխատավարձով չի հարստանում, մարդիկ հարստանում են բիզնես ստեղծելով, իսկ նախկինում՝ Հայաստանում մարդիկ հարստացել են կոռուպցիոն մեթոդներով։ Հույս ունեմ, որ որոշ ժամանակ անց, մեր բարեփոխումները կտանեն նրան, որ կհարկվի ոչ թե աշխատավարձը, այլ տնօրինվող եկամուտը՝ հանած ծախսերը։ Համահարթ հարկման արդյունքում, այն անձինք, ովքեր ունեն ավելի շատ անշարժ գույք, կհարկվեն ավելի շատ»։

Այն դիտարկմանը, որ տարբեր երկրներում, որտեղ գործում է համահարթ հարկման մոդելը, տարբեր մարդիկ տարբեր կերպ են հարկվում, եկամուտներից հանվում են նրանց ծախսերը, օրինակ՝ կոմունալ վճարումները, կամ, եթե մարդն  ունի երեխաներ՝ ավելի քիչ հարկ է վճարում, հնարավո՞ր է, որ Հայաստանում նույնպես գործի նման մոդել, պատգամավորն ասաց, որ ֆինանսների նախարարությունը պետք է նախաձեռնի անհրաժեշտ քայլերը։ Այդ տարբերակը բացառված չէ։ Սողոմոնյանը դժվարացավ նշել, թե որքան ժամանակ անց կլինի նման մոդել։

«Տարբեր առիթներ եղել են տեսակետների փոխանակումներ անելու։ Նրանք հանդիպել են օրենսդիր մարմնի ներկայացուցիչների հետ և հայտնել են իրենց տեսակետները, այսինքն՝ այնպես չէ, որ մենք չենք լսել իրենց կարծիքը և չենք ներկայացրել մեր հիմնավորումները։ Հետագա շարունակությունները, եթե արդյունք չեն տալու և բանակցելու եզրեր չկան, կարծում եմ՝ անիմաստ է։ Կարծում եմ՝ մինչ այս արված քայլերը բավական են»,- եզրափակեց պատգամավորը՝ նշելով, որ ակտիվիստների հետ որևէ կոնսեսուսի չեն եկել ։